भांगरभूंय | प्रतिनिधी
माधव सिनाय देसायः चडांत चड लोकांनी लाव घेवपाचो उलो
भांगरभूंय । प्रतिनिधी
पेडणें: आझादी का अमृत महोत्सव आनी नितळ भारत मोहिमे खाला गोंयांतल्या दरेका म्हालांत स्वयंपूर्ण चवथीचो बाजार सरकारान सुरू केला. हे निमतान दर म्हालांतल्या महिला मंडळांक रोजगाराची बरी संद मेळोवन दिल्या. ह्या चवथीच्या बाजाराचो चडांत चड लोकांनी लाव घेवचो, असो उलो पेडणेंचे नगराध्यक्ष माधव सिनाय देसाय हांणी मारलो. पेडण्यां कदंबा बसस्टॅण्डाचेर 20 ऑगस्टाक स्वयंपूर्ण चवथीच्या बाजाराचें उक्तावण केले उपरांत ते उलयताले.
ह्या वेळार स्वयंपूर्ण मित्र म्हूण कला आनी संस्कृती खात्याचे उपसंचालक अशोक परब, श्रीकांत पेडणेंकार, वसंत परब, शंकर सावंत, दीपक पेडणेंकार, शिवप्रसाद मुरारी, फॅन्सी फर्नांडीस, राजेश नायक, नंदकुमार परब, साबा परब तेच वरीं पेडणेंची उपनगराध्यक्ष तृप्ती सावळ देसाय, नगरसेवक शिवराम तुकोजी, नगरसेवक मनोज हरमलकार, नगरसेविका अश्विनी पालेकार, नगरसेविका राखी कशाळकार, नगरसेविका विषाखा गडेकार, नगरसेविका तशेंच आदली उपनगराध्यक्ष उषा नागवेंकार, धनंजय शेटगांवकार, नयनी शेटगांवकार, दीपा शेटगांवकार आनी हेर मानेस्त हाजीर आशिल्ले.
सरकाराच्या माध्यमांतल्यान स्वयंपूर्ण चवथीचो बाजार ही संकल्पना गांवागांवांनी पावोवपा खातीर आनी गांवांतल्या महिला आप मजत गट जीं खाणां करतात तांचे खातीर ही एक पर्वणी थारतली. पूण तांचे खातीर एकादी कायमस्वरुपी सुवात उपलब्ध करून दिली जाल्यार तांकां आपलो म्हाल थंय विकपाक मेळटलो. अशी वेवस्था सरकारान करची, अशी मागणी ह्या वेळार उषा नागवेंकार हांणी केली.
नयनी शेटगांवकार हांणी सांगलें, पेडणें म्हालांत खूबशे महिला आपमजत गट आसात. तातूंतलीं बायलां आपल्याक फावता ते प्रमाण घरांत खाद्यपदार्थ तशेंच चवथीक लागपी विवीध जिन्नस तयार करतात. पूण तांच्या म्हालाक योग्य बाजारपेठ मेळना वा गिरायक मेळनात. ते खातीर सरकारान आनी थळाव्या आमदारान फुडाकार घेवन गांवागांवांत एकादें दुकान तांकां मेळोवन दिवचें, अशी तांणी मागणी केली. स्वयंपूर्ण बाजारांत वट्ट 15 स्टॉल्स आसात. तातूंत खाद्यपदार्थ, कपडे, शाकभाजी, फळां- फुलां आनी चवथीक लागपी हेर सामान विकपाक दवरलां. हो बाजार 30 ऑगस्ट मेरेन उक्तो आसतलो.
कायम स्वरुपी दुकान दिवपाची बायलांची मागणी
आमी घरांत केल्ले खाद्यपदार्थ खंय व्हरून विकपाचे, हो सदांच एक प्रस्न आसता. ताका लागून दरेक पंचायत पांवड्याचेर आनी म्हालाचे मुखेल सुवातेचेर सरकारान आमकां बाजाराची वेवस्था करून दिवची. कायम स्वरुपी एकादें दुकान वा बाजारांत एक स्टॉल मेळोवन दिलो जाल्यार आमकां आमचो म्हाल सहजतायेन विकपाक मेळटलो. हे नदरेन सरकारान यत्न करचे, अशें ह्या बाजारांतल्या खूबश्या स्टॉलधारक बायलांनी आपली प्रतिक्रिया दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
