भांगरभूंय | प्रतिनिधी
भांगरभूंय । प्रतिनिधी
दिवचलः महाराष्ट्राच्या विधानसभेचे सभापती राहुल नार्वेकार हांणी मंगळाराक दिवचले येवन भाजपा कार्यकर्त्यां कडेन संवाद सादलो. एक गोंयकार सध्या महाराष्ट्राच्या विधासभेचो सभापती जाला. एक गोंयकार म्हणून हाचो म्हाका अभिमान दिसता. दिवचलकारांनी दिल्लो मोग विसरपाक जावचो ना, अशें ताणी ह्या वेळार सांगलें.
दिवचलचो भाजपा फुडारी वल्लभ साळकार आनी मयेंचो आमदार प्रेमेंद्र शेट हांणी नार्वेकार हांका येवकार दिलो. ह्या वेळार विश्वास गांवकार, गोंय विधानसभेचे आदले सभापती राजेश पाटणेकार, नगराध्यक्ष कुंदन फळारी, डॉ कौस्तुभ पाटणेकार हाजीर आशिल्ले.
फाटले विधानसभा वेंचणुके वेळार दिवचल मतदारसंघात प्रचारा खातीर आयिल्लों. त्या वेळार जायत्या जाणां कडेन इश्टागत जाली. महाराष्ट्र विधानसभेची वेंचणूक लडयली. आमदार जालो आनी हालींच सभापती जालों. दिवचलच्या इश्टांक मेळपा खातीर ही संवाद कार्यावळ आयोजीत केली अशें नार्वेकार हांणी स्पश्ट केलें. ह्या वेळार तांणी कार्यकर्त्यां कडेन संवाद सादलो. सूत्रसंचालन अरूण नायक हांणे केलें आनी विश्वास गांवकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
