भांगरभूंय | प्रतिनिधी
गांधी जयंती दिसा राजभवनाचेर नितळसाण मोहीम
पणजी, प्रतिनिधी : सत्य आनी अहिंसा ह्या तत्वांचेर आदारिल्ली महात्मा गांधी हांची जीण संवसारातल्या सगळ्या थरांतल्या लोकांक आयज लेगीत उर्बा दिवपी आसा. संवसारांतल्या सगळ्या मळा वयले लोक गांधीजींक आदरान पळयतात. सगळ्यांनी गांधीजींच्या तत्वांक पालव दिवपाचो यत्न करपाक जाय अशें राज्यपाल पी. एस. श्रीधरन पिल्लय हांणी म्हणलां.
राजभवनाचेर आयज महात्मा गांधी हांची जयंती मनयली. राज्यपाल पिल्लय हांणी गांधीजींच्या पुतळ्याक फुलांचो झेलो घालून आर्गा ओंपली. कार्यावळीक रिटा श्रीधरन पिल्लय, राज्यपालांचे सचीव एम. आर. एम. राव आनी हेर मानेस्त हाजीर आशिल्ले.
गांधी जयंती निमतान राज्यपालांनी जनतेक परबी दिली. गांधीजींच्या विचारांनी शेकड्यांनी संस्था निर्माण जाल्यो. गांधीजींच्या विचारांचे आचरण करीत बरेच लोक समाजीक कार्य करतात. दरेका मनशाचो विचार लक्षात घेवन आनी सगळ्यांक वांगडां घेतले जाल्यार खंयचीय मोहीम वा कार्य येसस्वी जाता. भगवद्गीते सयत हेर धर्मग्रंथाच्या वाचनातल्यांन तांची विचारसरणी तयार जाली.
भारतीय जनतेक संदेश किदें, असो प्रस्न एका पत्रकारान तांकां विचारिल्लो. म्हजी जीण होच म्हजो संदेश, अशी जाप गांधींजीन दिली.
हे वेळार ज्ञानेश्वर पाटील, मौलाना मोहम्मद इर्फान रझा आनी फादर फ्रान्सीस अकारा हांचीं भाशणां जालीं. कार्यावळी उपरांत जाल्ले ‘स्वच्छता ही सेवा’ मोहिमेंत राज्यपाल पिल्लय हांचे सयत सगळ्यांनी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
