भांगरभूंय | प्रतिनिधी
प्रवीण आर्लेकारः तोरशेंचे मसुंडीची पळोवणी
भांगरभूंय । प्रतिनिधी
पेडणें: मनशाचें दुसरें घर म्हणल्यार मसुंडी. थंय मनशाक कोणूच आडावपाक शकना. थंय मनशाक शांततायेन वचपाचो अधिकार आसा, अशें पेडणेंचे आमदार तशेंच हस्तकला म्हामंडळाचे अध्यक्ष प्रवीण आर्लेकार हांणी सांगलें.
तोरशेंचे पुराय जाल्ले मसुंडेची पळोवणी केले उपरांत आमदार आर्लेकार उलयताले. ह्या वेळार तांचे वांगडा उपसरपंच उत्तम वीर, पुजा साटेलकार, स्वाती तोरसकार, आदले जिल्हो पंचायत वांगडी रमेश सावळ हाजीर आशिल्ले.
पेडणें म्हालांत भोवतेक वाठारांनी वेगवेगळ्या समाजा खातीर मसुंड्यो वांटून दिल्यात. तातूंत दुसऱ्या समाजांतल्या मनशांचेर निमाणे संस्कार करपाक हरकत घेतात. पूण हे फुडें आपूण ही प्रथा बदलतलों. ते खातीर आपूण स्वता यत्न करतलों, अशें उतर आमदार आर्लेकार हांणी दिलें.
मजगतीं, तोरशें गांवांत नव्यान बांदिल्ले फुटपाथीचें उक्तावण केले उपरांत आमदार आर्लेकार हांणी ताची पळोवणी केली. तोरशें गांवांतल्या अडकून पडिल्ल्या कामां संबंदांत नियाळ घेतले उपरांत तीं कामां ताकतिकेन पुराय करपाचें आस्वासन तांणी तोरशेंकारांक दिलें.
गांवांत कोणाचीच वाट आडावची न्हय. दरेकल्याक स्वतंत्र आनी बरी वाट मेळची हे खातीर आपूण सरकार दरबारांत यत्न करतलों, अशेंय आमदार आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
