भांगरभूंय | प्रतिनिधी
रश्मी शिरोडकार: काम चालू आशिल्ले सुवातेर सगळे तरेचे उपाय केल्यात
मंत्री बाबूश मोन्सेरात हांणी घेतली गंभीर दखल
पणजी, प्रतिनिधी: आयज सकाळीं २१ पिरायेच्या आयुष हळर्णकार ह्या तरणाट्याक स्मार्ट सिटी खाला पणजे रस्त्यांची कामां करपी कंत्राटरांच्या चुकीच्या कामांक लागून मरण आयलें असो दावो थळावे करतात. मात कंत्राटदारान हो दावो न्हयकारला.
अपघात घडचे न्हय देखून काम चालू आशिल्ले सुवातेर गरजेचे सगळे तरेचे उपाय केल्ल्याचें मलनिस्सारण कामाची पर्यवेक्षक तशेंच सहाय्यक अभियंता रश्मी शिरोडकार हांणी प्रतिनिधीं कडेन स्पश्ट केलें.
पणजे स्मार्ट सिटी प्रकल्पा खाला मळा-पणजे मागारचेर घाणयार्या उदकाचीं पायपां बसोवपाचें काम चालू आसा. आयज सकाळीं पणजे मळ्यांत बुलेट मोटारसायकल पडून आयुष रुपेश हळर्णकार (२१, रायबंदर) हाका मरण आयलें. काम चालू आशिल्ल्या जाग्यार एका फोंडकुलांत मोटारसायकल पडून थंयच आडकून उरिल्ल्यान ह्या तरणाट्याक मरण आयलें. थळावे लोक ह्या आयुषाक मरण आयिल्ल्याचें कारण कंत्राटदारांक थारायतात.
हे विशीं रश्मी शिरोडकार हांचे कडेन संपर्क केलो तेन्ना, सोमारा सकाळीं घडिल्ल्या अपघाताक कंत्राटदार जापसालदार नाशिल्ल्याचें स्पश्ट केलें. पुराय दिसाचें काम सोंपल्या उपरांत ह्या फोंडकुलांक लागून अपघात घडचे न्हय देखून कामाचे सुवातेर बॅरिकेड्स लायतात. तशेंच रस्त्याचेर पातळिल्ली माती काडटात. थंय उदक शिपडायतात. अपघात जाल्लो ते सुवातेरूय बॅरिकेड्स लायिल्ले. कामाची म्हायती दिवपीय बोर्ड लायिल्लो. कामाचे सुवातेर अपघात जावचे न्हय हाची जतनाय आमी पुरायेन घेतात. ताका लागून सोमारच्या अपघाताक कंत्राटदाराक जापसालदार धरप चुकीचें अशें तिणें म्हणलें.
मळा-पणजेच्या रस्त्यांचेर कॉंक्रीट घालतले. ताका लागून पयल्या टप्प्यांत घाणयार्या उदकाचीं पायपां घालपाचें काम चल्लां. हें काम आनी अडेज ते तीन म्हयने चलतलें अशें शिरोडकार हांणी नमूद केलें.
मजगतीं, आयुष हळर्णकराच्या अपघाता उपरांत महानगरपालिका जागी जाल्या. पणजेचे आमदार मंत्री बाबूश मोन्सेरात हांणीय ह्या अपघाताची खर दखल घेतल्या. सोमारा सकाळीं मंत्री बाबुश मोन्सेरात हांणी रश्मी शिरोडकार हांचे कडेन आयुष हळर्णकराच्या अपघाता विशीं चर्चा केली. तशेंच कामाचे सुवातेर गरजेचे उपाय करपाच्यो सुचवण्योय केल्यो.
दोन दिसां सावन रातची विजूच नाशिल्ली
आयुष हळर्णकार हाका जंय पडून मरण आयलें त्या वाठारांत फाटल्या दोन दिसां सावन रातची लायट नाशिल्ली. अशी म्हायती मेळ्ळ्या. आमच्या कनिश्ठ अभियंत्यान सोमारा हे विशीं म्हायती आमकां दिली, अशेंय शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
