भांगरभूंय | प्रतिनिधी
नवी दिल्ली, खबरां संस्था ः मळबांतल्यान पडपी फातर हिऱ्या परस चड म्हारग आसूं येता अशें तुमकां केन्ना दिसलां? हो मंगळ गिऱ्यावेलो फातर जाची 34 कोटी रुपयांनी पावणी जातली.
धर्तरेचेर मंगळाराचो व्हडलो फातर मेळ्ळा, जो ह्या म्हयन्याच्या निमाणे मेरेन 34 कोटी मेरेन खपपाक शकता. मंगळाचो हो आतां मेरेन मेळिल्लो सगळ्यांत व्हडलो कुडको आसून ताका एनडब्ल्यूए १६७८८ उल्कापिंड अशें म्हण्टात. न्यूयॉर्कांतल्या सोथेबी ह्या नामनेच्या पावणी घरांत 16 जुलयाक ताची पावणी जातली.
नायजरांतल्या अगाडेझ वाठारांत एका शास्त्रज्ञाक एक आगळोच फातर मेळ्ळो. ताचें वजन २४ किग्रॅ आशिल्ले. मंगळावेल्यान पडपी उल्कापिंडा परस तो खूब व्हड आसा. ह्या फातराचें मोल १७ कोटी ते ३४ कोटी रुपया मदीं थारायलां. आतां मेरेन 77 हजार उल्कापिंड धर्तरेचेर पडल्यात, तातूंतले फकत 400 उल्कापिंड मंगळा वयले आसात. देखूनच ताची पावणी खास आसता.
जुलय-ऑगस्टांत धर्तरी चड वेगान घुंवतली
धर्तरी घुंवता आनी ताका लागून दीस आनी रात आसतात. पूण आतां शास्त्रज्ञांचो अदमास आसा की ह्या वर्सा जुलय आनी ऑगस्ट म्हयन्यांत धर्तरी मात्शी वेगान घुंवतली. हाका लागून दीस मात्शे ल्हान जातले.
धर्तरेचें घुंवप आनी वेळेचेर लक्ष दवरपी ‘timeanddate.com’ ह्या संकेतथळान एक नवो अहवाल जाहीर केला. ते प्रमाण, 9 जुलय, 22 जुलय आनी 5 ऑगस्ट 2025 ह्या दिसा सगळ्यांत उणे दीस आसपाची शक्यताय आसा. पूण हो बदल इतलो ल्हान आसतलो की तुमकां तो कळचो लेगीत ना, कारण तो मिलीसेकंदांत मेजतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
