भांगरभूंय | प्रतिनिधी
गोंयचे युतिका सतरकारान गुजरातांत चालू आशिल्ले 36वे राष्ट्रीय खेळां सर्तीच्या मल्लखांब खेळांत कांश्या पदक जिखलें. ह्या येसा सयत गोंय पदक तकट्यांत पांच पदकां सयत 30वे सुवातेर आसा.
युतिका सतरकाराक वैयक्तीक रोप उक्त्या प्रकारांत तिसरी सुवात फावो जाली. महाराष्ट्राचे रुपाली गंगावणे हिणें 9.25 गुणां सयत भांगरा पदक जिखलें, जाल्यार मध्य प्रदेशाचे सिद्धी गुप्तान रुप्या पदक जोडलें. तिचे 9.02 गूण जाले. युतिकाचे 9.05 गूण जाले.
ह्या जैता उपरांत गोवा मल्लखांब असोसिएशनाचे सचीव एन व्ही कुराडेन खोस उक्तायली. युतिकान जिखिल्लें हें पदक गोंयच्या चले आनी चलयांक मल्लखांब ह्या पुर्णपणान भारतीय खेळा कडेन आकर्शीत करपाक मजत करतलें अशें ताणें सांगलें.
खेळां मंत्री गोविंद गावडे हांणी युतिकाची तोखणाय केली. युतिकाच्या ह्या येसाक लागून पुर्ण गोंयाक खोस जाल्या अशें गोविंद गावडे हांणी म्हणलें.
युतिकाक शारिरीक शिक्षण शिक्षक प्रज्योत नायक आनी समिक्षा गावेड हांणी मल्लखांबाचें प्रशिक्षण दिल्लें. युतिकान दोगांयचे उपकार मानलें. तशेंच घरांतल्यान मेळपी तेंक्याक लागून तिणें आपल्या कुटुंबाचे लेगीत उपकार मानलें.
फुडारांत लेगीत विवीध राष्ट्रीय पांवड्या वयल्या सर्तींनी वांटो घेवन मल्लखांब प्रकारांत बरें प्रदर्शन करून गोंयचें नांव परतून एकदां राष्ट्रीय पांवड्याचेर पर्जळीत करतलें अशें युतिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
