भांगरभूंय | प्रतिनिधी
खबरां संस्था
क्वालालंपूरः सात्विकसाईराज रेंकीरेड्डी आनी चिराग शेट्टी हे जोडयेक मलेशियन ओपन बॅडमिंटन सर्तीचे दोट्टीचे फायनलींत हार खावची पडली. चीनाच्या वांग- लियांग जोडयेन तांका 9-21, 21-18, 21-17 अश्या गेमीनी हारयलें. तांका रुप्या पदकाचेर खोशी मानची पडली. पूण मलेशियन ओपन सर्तींत रुप्या पदक मेळोवपी ही पयली भारतीय जोडी थारली. हाचे पयलीं भारतीय खेळगडे एकोडी, दोट्टी वा मिश्र दोट्टींत केन्नाच फायनलींत पावले नात.
सात्विक-चिराग जोडयेन फायनलीची पयली गेम सहज जिखली. ताणी चीनाच्या वांग-लियागाक 21-9 अशें हारयलें. मात दुसरे गेमीन चोडी जोडयेन आपलो खेळ दाखोवपाक सुरवात केली. ही गेम तांणी 21-18 अशी जिखून बोरोबोरी केली. तिसरे गेमीन सात्विक- चिरागान 7-2 अशी सुरवेक आघाडी घेतली. मात चीनी जोडयेन आक्रमक खेळ करून तांका फाटीं उडोवन 16-14 अशी मजल मारली आनी उपरांत 21-17 अशी ही गेम जिखून भांगरा पद आपल्या नांवार केलें.
सात्विक- चिराग जोडयेची ही मॅच सर्तींत पयलेच फावट तीन गेम चल्ली. हाचे पयलींच्या चार मॅची ताणी दोन गेमींनी जिखल्ल्यो. फायनलींत पयली गेम एकतर्फी जिखल्ल्यान ते सहज भांगरा पदक मेळयतले अशें दिसतालें. पूण दुसरी गेम 3 गुणानी आनी तिसरी गेम 4 गुणानी ते हारले. मलेशियन ओपन बॅडमिंटन सर्त 1937 सावन जाता. भारतीय खेळगड्यान तातूंत अजून किताब मेळयल्लो ना. सात्विक-चिराग जोडये कडल्यान ती आस्त आशिल्ली. पूण ते भांगरा पदक मेळोवपाक शकले ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
