भांगरभूंय | प्रतिनिधी
निलेश काब्रालः प्रदुशणाक आळो घालपा खातीर खर पावलां
पणजी : प्रदुशणाचेर नियंत्रण दवरपा खातीर नव्या बांदकामाक मलनिस्सारण वेवस्थेचो आराखडो सादर करप बंधनकारक जातलो. मलनिस्सारण वेवस्थेचो आराखडो सादर केलो ना जाल्यार नव्या बांदकामाक उदकाची जोडणी मेळची ना. हे विशींचो रितसर निर्णय बेगिनूच जातलो अशें भौशीक बांदकाम खात्याचे मंत्री निलेश काब्राल हांणी सांगलें.
घाणयारे उदक सोडपाच्या घडणुकांक लागून न्हंयो तशेंच उदकाचे सांठे प्रदुशीत जावपाचे प्रमाण वाडलां. साळ न्हंय प्रदुशीत जावप हें एक मुखेल कारण. न्हंयो तशेंच उदकाच्या सांठ्यातलें प्रदुशण नियंंत्रीत दवरपा खातीर खर पावलां उबारपाची गरज आसा. साळ न्हंयेच्या उदकाच्या प्रदुशणा खातीर सगले जाण भौशीक बांदकाम खात्याक जापसालदार धरतात. प्रदुशणाक आळो घालपाची जापसालदारकी फक्त भौशीक बांदकाम खात्याची आसा काय कितें? पंचायतींची वा नगरपालिकांची कसलीच जापसालदारकी ना? असो प्रस्न भौशीक बांदकाम खात्याचे मंत्री निलेश काब्राल हांणी केलो.
अल्तिन्यार भौशीक बांदकाम खात्याचे कार्यावळींत मंत्री काब्राल उलयताले. कंत्राटी पद्दतीचेर काम करपी अभियंत्यांचो कामगार सोसायटींत आस्पाव करपाची कार्यावळ जाली. 51 अभियंत्यांक आतां कामगार सोसायटी खाला घेतल्यात. ह्या अभियंत्यांक आतां चड पगार मेळटलो. हे विशीं उलयतना भौशीक बांदकाम खात्याच्या मंत्र्यांनी तरेकवार विशयांचेर उलोवप केलें. कनिश्ठ अभियंत्यांक म्हयन्याक 30 हजार रुपया पगार मेळटलो जाल्यार तंत्रीक सहाय्यकांक म्हयन्याक 45 हजार रुपया पगार मेळटलो. साळ न्हंयचें प्रदुशण वाडलां. बाणावलीचे आमदार वेंझी व्हिएगश हांणी हो विशय लावन धरला. बांदकाम प्रकल्पांतलें घाणयारे उदक साळ न्हंयेंत सोडपाचे प्रकार सुरूच आसात. ह्या प्रकल्पांचेर कारवाय करपाची मागणी आसा.
लोकां कडल्यान उणो प्रतिसाद
बाणावले घाणयाऱ्या उदकाचो प्रकल्प तयार जाला. घाणयाऱ्या उदकाचे जोडणे खातीर दोन फायली आयल्यात. लोकां कडल्यान जोडणे खातीर उणो प्रतिसाद मेळटा. घाणयाऱ्या उदकाचे जोडणे खातीर लोकांनी मुखार येवपाक जाय अशें निलेश काब्राल हांणी सांगलें.
मलनिस्सारण वेवस्थेचो आराखडो जो मेरेन सादर जायना, तो मेरेन उदकाची जोडणी दिवप ना असो नेम कर्नाटकांत आसा. हो नेम गोंयांतूय लागू करपाचो प्रस्ताव आसा. प्रदुशण नियंत्रण मंडळा कडेन चर्चा करून हाची कारवाय करची पडटली. घाणयाऱ्या उदकाचो विलो लावपाची जापसालदारकी दरेका घाराची आसा. हाची वेगळी वेवस्था आसपाक जाय. बांदकाम सुरू आसतना कोयर तशेंच घाण तयार जाता ताचो योग्य तरेन विलो लावंक जाय अशें मंत्री निलेश काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
