‘मरिना’ सारक्या प्रकल्पाची राज्याक गरज

भांगरभूंय | प्रतिनिधी

मुख्यमंत्री: सरकारान आजूनय मरिना प्रकल्पाक मंजुरी वा परवानो दिवंक ना

पणजी : आमदार क्रूज सिल्वा हांणी शुक्रारा प्रस्न जापेच्या काळांत ‘मरिना’चो प्रस्न मांडलो. ताका जाप दितना मुख्यमंत्री डॉ. प्रमोद सावंत हांणी, ‘मरिना’ सारक्या प्रकल्पाची राज्याक गरज आसा. असल्या प्रकल्पांक फाटबळ दिवपाची गरज आसा. राज्य सरकारान आजूनय मरिना प्रकल्पाक मंजुरी वा कसलेच परवाने दिवंक नात. हे विशीं भौशीक सुनावणी दवरल्या, ताचे उपरांतूच निर्णय घेतले अशें सांगलें.
दर्यादेग वाठारांत वेवस्थापन आराखडो २०१९ आजुनय अस्तित्वांत येवंक ना. तरीय सरकार हो प्रकल्प मुखार धुकलपाचो कित्याक यत्न करता. मरिना प्रकल्पाचो थळावे परंपरीक नुस्तेंकार आनी थळाव्या लोकांक बरोच व्हड फटको बसपाचो आशिल्ल्याची म्हायती आसून लेगीत सरकार ह्या प्रकल्पाक फाटबळ कित्याक दिता, असो प्रस्न आमदार क्रूज सिल्वा हांणी हाजीर केलो.
हे विशीं मुख्यमंत्र्यान म्हणलें, हरीत तशेंच ‘मरिना’ सारकिल्ल्या प्रकल्पांक फाटबळ दिवपाची गरज आसा. राज्य सरकारान आजूनय मरिना प्रकल्पाक मंजुरी वा कसलेच परवाने दिवंक ना. हे विशीं भौशीक सुनावणी दवरल्या. ही सुनावणी जाले उपरांतूच मरिना प्रकल्पा विशीं निर्णय घेतले.
विरोधी पक्ष फुडारी युरी आलेमाव, आमदार कार्लुस फेरेरा, आलेक्स रेजिनाल्ड हांणीय ह्या प्रकल्पा आड भुमिका मांडली.

सरकार प्रकल्प रद्द करतलें काय ना?
नावशेचो मरिना प्रकल्प अगरवाल कन्स्ट्रक्शन उबारपाक सोदता. अगरवाल कन्स्ट्रक्शनाक असले प्रकल्प उबारपाचो अणभव ना. ह्या प्रकल्पा खातीर पर्यावरणीय दाखल्यांची गरज नाशिल्ल्याचो अहवाल दिला. ताका लागून राज्य सरकार हो प्रकल्प फुडें धुकलपाचो यत्न करता अशें दिसता. ताका लागून हो प्रकल्प रद्द करतले काय ना, हाची जाप राज्य सरकारान दिवची, अशी मागणी सांतआंद्रेंचे आमदार विरेश बोरकार हांणी केली. मात, मुख्यमंत्री डॉ. सावंत वा पर्यावरणमंत्री सिक्वेरा हांणी हाचेर कसलीच जाप दिवंक ना.