भांगरभूंय | प्रतिनिधी
पणजी, प्रतिनिधी : तिर्थबाग – मयेंच्या सरकारी जमिनीचीं बोगस कागदपत्रां कुटुंबाच्या नांवार करून ती जमीन धेंपो कंपनीक लिजाक दिवपाचो आरोप आशिल्ल्या विद्याधर तळवणेकार हाका आयज पुलिसांनी ताब्यांत घेतलो. तो फरारी आशिल्लो. काल ह्या प्रकरणांत दिवचल पुलिसांनी सीताबाय तळवणेंकार हिका अटक केल्ली. जमीन दिवन तळवणेकार हांणी १३ लाख रुपया घेतल्यात, अशें पुलिसांनी सांगलें.
दिवचल पुलिसांनी दिल्ले म्हायती प्रमाण, हे विशीं दिवचल उपजिल्होधिकारी रोहन कासकार हांणी कागाळ दाखल केल्ली. ते प्रमाण तिर्थबाग – मयें हांगाच्या सर्व्हे क्रमांक १४४/० आनी १४५ मदली ८२,५५० चौखण मिटर सरकाराची जमीन आपल्या पुर्वजांची आशिल्ल्याचें दाखोवन तळवणेंकार हाणें धेंपो कंपनीक मायनिंगे खातीर लीजाचेर दिली. हे खातीर दुबावीत विद्याधर, सीताबाय, आनी वनिता तळवणेंकार हांणी १४ ऑगस्ट २००४ दिसा पणजे नोटरी वरवीं धेंपो कंपनी कडेन करार करून १३ लाख रुपया घेतिल्ले.
ही रक्कम दुबावितांनी कुटुंबांतल्या हेर वांगड्यांक दिवंक नाशिल्ली. ताका लागून तांचे मदीं वाद निर्माण जाल्या उपरांत तांचे कुटुंबांतल्याच एकल्यान संबंदीत जमिनी विशीं उत्तर गोंय जिल्हाधिकार्यांकडे (महसूल) कागाळ केल्ली. हाची दखल घेवन दिवचल उपजिल्हाधिकार्यांक चवकशी करपाक सांगिल्लें. तेन्ना ही जमीन सरकाराची आशिल्ल्याचें कळ्ळें. ते प्रमाण दुबावितां आड पुलिशेंत कागाळ दाखल केली. हाची दखल घेवन दिवचलचे पुलीस निरीक्षक राहुल नायक भंडारी हांच्या मार्गदर्शना खाला उपनिरीक्षक प्रसाद पाळणी हांणी गुन्यांव दाखल केलो आनी फुडली कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
