भांगरभूंय | प्रतिनिधी
म्हापशें: पर्वरे ओ कोकेरो जंक्शनाचेर मनोरुग्णान मोटार आडावन आनी तिचेर हातोडी मारून तिचो हारसो फोडलो. हो प्रकार रस्त्याचेरूच घडलो. ह्या प्रकरणांतलो मनोरुग्ण शेखर उर्फ लकी कवळेंकार (मायणा- पिळर्ण) हाका मनोरुग्ण हॉस्पिटलांत दाखल केला.
ही घडणूक शेनवारा सकाळीं 11.45 वरांच्या सुमाराक घडली. कांदोळेचे मान्युएल फर्नांडीस (ओड्डा- कांदोळी) हांची जीए 03 डब्ल्यू 4834 क्रमांकाची रेंट ए कॅब ही आयटेन व्टेंटी मोटार घेवन ताचो चालक अँथन डायस कांदोळेच्यान कळंगूटचे दिशेन वताले. हे मोटारीचो शेखर कवळेंकार हाणें फाटलाव केलो आनी ती पर्वरे ओ कोकेरो जंक्शनाचेर आपली जीए 03 8789 क्रमांकाची मोटारसायकल आडवी घालून आडायली. उपरांत ताणें आपले कडले हातोडेन मोटारीचेर धपके मारपाक सुरवात केली..
ह्या प्रकाराक लागून भियेल्लो मोटार चालक घडणुकेचे सुवाते वयल्यान पळून गेलो. हे घडणुकेचो व्हिडियो सोशल मिडियाचेर व्हायरल जाला. दुबावितान मोटारीचे सगळे हारशे आनी लायटी हातोडीन फोडल्यो. तशेंच बोनेटाचेर हातोडी मारून ताचीय तोडफोड केली. हे घडणुकेंत मोटारीचें सुमार एका लाखाचें लुकसाण जालां.
घडणुकेची म्हायती मेळटाच पर्वरी पुलिसांनी घडणुकेचे सुवातेचेर वचून दुबाविताक धरलो आनी पुलीस स्टेशनाचेर हाडलो. तेन्ना दुबावीत मनोरुग्ण आशिल्ल्याचें कळ्ळें. मानसीक दुयेंसाक लागून ताणें काम केल्ल्याचें उपरांत स्पश्ट जालें. ह्या प्रकाराक लागून वरभर राष्ट्रीय म्हामार्गा वयली येरादारी आडावली. पर्वरी पुलिसांनी दुबाविताक मनोरुग्णालयांत दाखल केला. थंय ताचेर उपचार चालू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
