भांगरभूंय | प्रतिनिधी
मुंबय पंगडा आड चालू आशिल्ले रणजी करंड सर्तीचे फायनलींत मध्य प्रदेशान जबरदस्त प्रत्युत्तर दितना पयले खेपे रणजी सर्त जिखपा वटेन नेटान पावलां मारपाक सुरवात केल्या.
युवा बॅट्समन यश दुबे आनी शुभम शर्मां हाणी शेंकड्यांची खेळी केली तशेंच दोगांयनी दुसरे विकेटी खातीर 222 धांवड्यांची भागिदारी करून मुंबयक निर्शेणी हाडली.
मुंबयन पयल्या डावांत 374 धांवड्यो केल्यो. हो स्कोर मध्य प्रदेशा खातीर व्हड थारतलो अशें दिशिल्लें. पूण, दुबेन 236 बॉलांनी 14 चवक्यांचे मजतीन 113 धांवड्यो केल्यो, जाल्यार शुभमान 215 बॉलांनी 15 चवके आनी एक सको मारून 116 धांवड्यांचें योगदान दिवन पंगडाक बरे स्थितींत हाडलो.
मध्य प्रदेशान तिसऱ्या दिसाचो खेळ सोंपलो त्या वेळार 3 विकेटी वगडावन 368 धांवड्यो केल्ल्यो. त्या वेळार रजत पाटीदार 106 बॉलांनी 13 चवक्यांचे मजतीन 67 आनी मुखेली आदित्य श्रीवास्तव 33 बॉलांनी 11 धांवड्यो करून खेळपट्टीचेर आशिल्लो. अशे तरेन मध्य प्रदेश पयल्या डावाच्या आदाराचेर मुंबय परस फक्त स धांवड्यांनी फाटीं आसा. ताका पयल्या डावांत निर्णायक आघाडी घेवपाक फक्त सात धांवड्यांची गरज आसा.
मध्य प्रदेश निमाणे खेपे 1998-99त फायनलींत पाविल्लो. पूण, त्या वेळार कर्नाटका कडल्यान हार घेवची पडिल्ली.
मजगतीं, मध्य प्रदेशान तिसऱ्या दिसाची सुरवात 1 बाद 123 धांवड्यां वयल्यान केल्ली. ते उपरांत तिसऱ्या दिसा धिटायेन खेळटना आनीक 245 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
