भांगरभूंय | प्रतिनिधी
पणजी ः राज्यांतल्या अनुदानित शिक्षणीक संस्थांक हाचें फुडें लेगीत आप मजत गट मदले सुटयेंतलें खाण दितले. पूण, तांकां विद्यार्थ्यांक पोशक आनी दर्जेदार खाण दिवचें पडटले. मदले सुटयेंतल्या खाणां खातीर ‘अक्षयपात्र’ संस्थेची नेमणूक केल्या. पूण तांचे वरवीं णवी ते बारावी मेरेनच्या आनी फुडाराक दीसभर शाळा चालू उरली जाल्यार थंयच्या विद्यार्थ्यांक खाण पावयतले अशें आश्वासन मुख्यमंत्री डॉ. प्रमोद सावंत हांणी दिले.
आमदार डॉ. चंद्रकांत शेट्ये हांणी सोमारा विधानसभेंत प्रस्न-जाप वेळार मदले सुटयेंतल्या खाणांचो प्रस्न मांडलो. मदले सुटयेंतलें खाण येवजणे खाला राज्यांतल्या विद्यार्थ्यांक पोशक आनी दर्जेदार खाण दिवप ही राज्य सरकाराची जापसालदारकी आसा. ते प्रमाण कांय आप मजत गटा कडलेन हें खाण दितात. हाचे फुडें लेगीत हो कंत्राट फकत आप मजत गटांकच दितले. पूण तांणी नितळसाण सांबाळून विद्यार्थ्यांक पोशक अन्न दिवप गरजेचें अशें मुख्यमंत्री डॉ. सावंत हांणी म्हणलें.
‘अक्षयपात्र’ ही संस्था सध्या देशांतल्या चवदा राज्यांनी सेवा दिता. तांच्या मदले सुटयेंतल्या खाणांची दर दिसा तपासणी जाता. ते विद्यार्थ्यांक पोशक खाण दितात. देखूनच राज्य सरकारान ‘अक्षयपात्र’ कडेन सामंजस्य कबलात केला. फुडाराक धावी ते बारावे मेरेनच्या विद्यार्थ्यांक आनी शाळा दीसभर चालू दवरपाचो निर्णय जालो जाल्यार थंय शिकपी विद्यार्थ्यांक ‘अक्षयपात्र’ वरवीं खाण दिवपाचो विचार सरकारान सुरू केला अशें मुख्यमंत्री डॉ. सावंत हांणी सांगलें.
दर्ज्याचेर तडजोड ना!
मदले सुटयेंतल्या खाणांच्या दर्ज्याचेर तडजोड जायना. पालक-शिक्षक संघटना आनी मुख्याध्यापकांनी बारीकसाणेन ताचेर नदर दवरल्या. मदले सुटयेंतल्या खाणांचो दर्जो इबाडला तें पळोवन कांय वाठारांनी मदले सुटयेंतल्या खाणाची जापसालदारकी पालक-शिक्षक संघटणेन घेतल्या अशेंय मुख्यमंत्र्यान सांगलें.
20 टक्के विद्यार्थी मदले सुटयेंतलें खाण खायनात
राज्यांतले सुमार 20 टक्के विद्यार्थी मदले सुटयेंतलें खाण खायनात. शारांतले विद्यार्थी मदले सुटयेंतलें खाण घेनात. पूण, गांवगिऱ्या वाठारांतले विद्यार्थी फकत मदले सुटयेंतलें खाणाचेर आदारून आसतात. शारांतले विद्यार्थी मदले सुटयेंतलें खाण घेनात हाचे कारण खाणाचो दर्जो न्हय, तर ताका हेर कारणां आसात अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
