भांगरभूंय | प्रतिनिधी
मडगांव, प्रतिनिधी ः फकत मतां फोडपा खातीर चर्चिल आलेमाव लोकसभा वेंचणूक लढोवपाक सोदता आनी हे खातीर भाजपच तांकां मुखार करता. पूण दक्षीण गोंयांत तांकां मतां मेळचीं नात. तांकां गोंयांत सुवात ना, तांणी चंद्राचेर वचून वेंचणूक लढोवची अशी टिका दक्षीण गोंयचे खासदार फ्रान्सिस सार्दिन हांणी केल्या.
दक्षीण गोंय काँग्रेस कार्यालयांत पत्रकार परिशद घेवन सार्दिन हांणी वेगवेगळ्या विशयांचेर टिप्पणी केली. पांच मदल्या चार राज्यांतल्या वेंचणुकांनी काँग्रेस जिखतली असो दावो करतना लोकसभा वेंचणुके विशीं फुडें उलयतले अशेंय तांणी स्पश्ट केलें. चर्चिला विशीं तांणी सांगलें, गोंयांत तांकां सुवात ना, तांणी चंद्राचेर वचून थंय वेंचणूक लढोवची, जंय तांकां विरोधक आसचे नात. भाजप तांका काँग्रेसीचीं मतां फोडपा खातीर वेंचणुकेक उबो करता असो आरोप तांणी केलो.
लोकांच्या आंदोलना उपरांत फेरी बोटींचें शुल्क वाडोवपाचो सरकारान घेतिल्लो निर्णय फाटीं घेतलो अशें खासदार सार्दिन हांणी सांगलें. पुल नाशिल्ल्यान काँग्रेस सरकाराच्या काळांत फेरीबोटीचो शुल्क घेनासले. रस्त्याच्या कुशीक लायटी घालपाक पयशे पंचायतींतल्यान घेवचे न्हय. वायट गजाली जावच्यो न्हय म्हणून त्यो सुविधा दितात. वीज बिलां वाडयल्यात आनी तरीय लायट वचपाचे प्रकार घडतात हाचेर सरकारान लक्ष दिवचें अशी मागणी सार्दिन हांणी केल्या.
शेतांचे बांद फुटल्यात. कांय कडेन दुरुस्त करतात पूण जायत्या सुवातींनी फुटिल्ले आसात. आतां दुरुस्ती खातीर 90 टक्के न्हय तर शंबर टक्के सबसिडी दिवपाची गरज आसा. दोन झाडां कापपा खातीर 1/14 प्रमाणपत्र घेतात आनी हेर कागदपत्रां घेतना अधिसुचीत प्रतिज्ञापत्र कित्याक घेतात? ते बंद करपाची गरज आसा. ल्हान हॉटेलांतल्या लॉन पार्टीं खातीर लेगीत शुल्क घेवपाचो सरकाराचो आदेश फाटीं घेवपाची गरज आसा. सरकार लोकां खातीर आसा आनी तांचे कडल्यान पयशे एकठांय करपा खातीर न्हय अशें सांगून संजीवनी साकर कारखान्याच्या जाग्यार इथेनॉल प्रकल्प बांदपाक लोकांचो विरोध आशिल्ल्यान हो प्रकल्प नाका तर साकर कारखानो चालू दवरचो अशी मागणी केल्या.
पांचांतल्या चार राज्यांनी काँग्रेसीक संद
सध्या देशांतल्या पांच राज्यांनी वेंचणूक जावपाची आसा. हांतूतल्या चार राज्यांनी काँग्रेस वेंचणूक जिखूंक शकता असो दावो करून त्या वेंचणुके उपरांत लोकसभेचे वेंचणुके विशीं आपूण उलयतलों अशें खासदार सार्दिन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
