भांगरभूंय | प्रतिनिधी
9 फेब्रुवारीक दिल्लो मुख्यमंत्र्यान राजिनामो, 21 म्हयने हिंसाचार, 300 परस अदीक जाणांक मरण
खबरां संस्था
इंफाळ : केंद्र सरकारान बिरेस्तारा मणिपूरांत राष्ट्रपती राजवट लागू केली. 9 फेब्रुवारीक मुख्यमंत्री एम. बिरेन सिंह हांणी राज्यपालां कडेन राजिनामो सादर केलो. राज्यांत 21 म्हन्यां सावन (3 मे 2023) चालू आशिल्ल्या वांशीक हिंसाचारांत 300 परस अदीक जाणांक मरण आयलां. ताका लागून बिरेन सिंह हांचेर राजिनामो दिवचे खातीर खूब चेपण आशिल्लें. विरोधी पक्ष लेगीत ह्या मुद्द्याचेर एनडीएचेर सेगीत प्रस्नचिन्न उपस्थीत करताले.
कुकी समाजाच्या आयटीएलएफ संघटणेची म्हणयारी गिंजा वूलजोंग हांणी सांगलें, मणिपूर विधानसभेंतल्या अविस्वास प्रस्तावाच्या भंयान बिरेन सिंह हांणी राजिनामो दिला. हालींच तांची एक ऑडियो क्लीप लीक जाल्ली, जाची सर्वोच्च न्यायालयान दखल घेतल्या. अशे परिस्थितींत भाजपाक लेगीत तांकां वाटावप कठीण दिसता.
बिरेन मुख्यमंत्री आसूं वा नासूं, आमची मागणी वेगळ्या प्रशासनाची आसा. मैतेई समाजान आमकां वेगळे केल्यात. आतां आमी फाटल्यान सरपाक शकनात. खूब रगत वारावलां. फकत राजकी उपायूच आमची समस्या सुटावी करपाक शकता. कुकू समाज अजून लेगीत वेगळ्या प्रशासनाचे मागणेचेर ठाम आसा, अशें गिंजा वूलजोंग हांणी म्हणलां.
राहूल गांधी हांणी म्हणलां, हिंसाचार, जिवांचें आनी मालमत्तेचें लुकसाण जावन लेलगीत प्रधानमंत्री नरेंद्र मोदी हांणी एन. बिरेन सिंह हांकां पदाचेर कायम दवरले. पूण आतां लोकांचें वाडटें चेपण, सर्वोच्च न्यायालया कडल्यान जावपी चवकशी आनी काँग्रेसीचो अविस्वास थाराव हाका लागून एन. बिरेन सिंह हांकां राजिनामो दिवचो पडलो. सध्याच्या काळांत सगळ्यांत म्हत्वाची गजाल म्हणल्यार राज्यांत शांतताय प्रस्थापीत करप आनी मणिपूरच्या लोकांचे घावे भरून काडचे खातीर काम करप. प्रधानमंत्री मोदी हांणी तत्काळ मणिपूराक भेट दिवची, थंयच्या लोकांचें म्हणणें आयकुचें आनी परिस्थिती सामान्य करचे खातीर तांणी कसल्यो येवजण्यो आंखल्यात त्यो सांगच्यो, अशें राहूल गांधी हांणी म्हणलां.
मुख्यमंत्र्याचेर हिंसाचार पेटयल्ल्याचो आरोप
कुकी ऑर्गनायझेशन फॉर ह्युमन रायट्स ट्रस्टाचे वतीन (कोहूर) न्यायालयांत एक याचिका दाखल केल्ली. तातूंत कांय ऑडियो क्लिपांची चवकशी करपाची मागणी केल्ली. तातूंत दावो केला, ऑडियोंत मुख्यमंत्री कथीत तरेन सांगतात, तांणी मैतेईंक हिंसाचार पेटोवपाक दिलो आनी तांकां संरक्षण दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
