भांगरभूंय | प्रतिनिधी
भांगरभूंय । प्रतिनिधी
पणजीः संवसारीक काळीज दिसा निमतान दोनापावलच्या मणिपाल हॉस्पिटलाच्या ‘रक्षक द सेव्हियर’ मोहिमेच्या पयल्या सत्राचें उक्तावण
बिरेस्तारा मुख्यमंत्री डॉ प्रमोद सावंत हांणी केलें. गोंयांतल्या लोकांक मुळावी जीण समर्थन क्रिया आनी सेवे विशीं शिक्षीत करून आपत्कालीन आनी गरजेच्या परिस्थितींत उपाय करपाक सक्षम करप हो हे येवजणेचो हेत आसा.
रक्षक मोहिमे खाला पुलीस दल, येरादारी विभाग, कदंब येरादारी म्हामंडळ, गोंय मनीस संसाधन उदरगत म्हामंडळ आनी उजो पालोवपी दळांतल्या दादले आनी बायलो मेळून 125 जाणांक जीव वाटावपाचें प्रशिक्षण दिलां. आमच्या राज्यांत दर वर्सा लाखांनी पर्यटक येतात. हालिंसाराक गोंयांत रस्तो अपघातांत वाड जाल्या. दर म्हयन्याक सरासरी दोनशें अपघात जातात. गोंयांतल्या लोकांक अशे परिस्थितींत प्रभावीपणान प्रतिसाद दिवपा खातीर, वैजकी नदरेन प्रशिक्षीत करपाची गरज आशिल्ली. रक्षक द सेव्हिरय हे मोहिमे वरवीं मणिपाल हॉस्पिटलात ती पुराय केल्या हाची म्हाका सामकी खोस भोगता, अशें मुख्यमंत्री डॉ सावंत हांणी मोहिमेचें उक्तावण केल्या उपरांत सांगलें.
गोंयांतल्या लोकां मेरेन रक्षक वा आपत्कालीन परिस्थितींत तारणहाराच्या रुपांत जीव वाटावपचें प्रशिक्षण दिवपी मोहीम सुरू करपाक आमकां खोस भोगता. आपत्काकाळांत प्राथमीक उपचार करप सामकें म्हत्वाचें आसता. लोकांक ते दिवपाचें प्रशिक्षण दिवप हो आमी सुरू केल्ले मोहिमेचो हेत आसा अशें मणिपाल हॉस्पिटल्स गोंयचे संचालक सुरेंद्र प्रसाद हांणी सांगलें.
मणिपाल हॉस्पिटलाचे विक्री आनी विपणन विभागाचे एचओडी हरी प्रसाद हांणी उपक्रमा विशीं आपले विचार मांडले. उक्तावण कार्यावळीक वैजकी अधिक्षक डॉ आदित्य गोस्वामी, ऑन्कोलॉजी विभाग मुखेली डॉ शेखर साळकार, सान्ताक्रुजाचो आमदार रुदोल्फ फर्नांडीस, कुशळताय उदरगत आनी उद्देजकता संचालक दीपक एस देसाय, उजो आनी आपत्कालीन संचालनालयाचे संचालक नितीन रायकार आनी मणिपाल हॉस्पिटलाच्या आपत्कालीन विभागाचो मुखेली डॉ जेधू हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
