भांगरभूंय | प्रतिनिधी
भांगरभूंय । पत्रक
पणजीः दोनापावला हांगच्या मणिपाल हॉस्पिटलांत भुरग्यां दुयेंस उदरगत केंद्राचें प्रुन्डट मीडियाचे मुख्य संपादक प्रमोद आचार्य हांचे हस्तुकीं उक्तावण जालें. भुरग्यांच्या दुयेंसाची मोलावणी, मार्गदर्शन करप तसेंच खाशेली गरज आशिल्ल्या भुरग्यांच्या दुयेंसाचें बेगीन निदान करून तांच्या पालकां मदीं जागरुताय करपाचें काम ह्या केंद्रावतीन करतले.
कथ्थक तन्ज्ञ आनी विशेश भुरग्याची प्रशिक्षक ममता हुसेन हिणे भुरग्यां खातीर एक थॅरपी म्हणून नाच शिकोवपाचो तांचो अणभव सांगलो. नामनेच्या हॅनेन सेंटरांतली एक शिक्षिका केली अॅन डिसिल्वहा हिणे भुरग्यांक वळखपाची आनी तांकां आदार दिवपीची गरज सांगली. भुरग्यांची वाड आनी उदरगतीचो सगल्यांत म्हत्वाचो काळ 0 तें 8 वर्सां आसता. त्या वेळार तांची बरी बुन्याद घालपाक मेळटा. भुरगीं दुयेंस उदरगत केंद्राचो उद्देश सगल्या ल्हान भुरग्यां खातीर चड करून असुरक्षीत गुरवारपणा सावन तें भुरगें शाळेंत प्रवेश करमेरेनचे पिरायेमेरेन तांका उदरगतीच्या तांकी मेरेन पावोवपा हो आसा अशें मणिपाल हॉस्पिटलाचे संचालक सुरेंद्र प्रसाद हांणी सांगलें.
भुरग्यांचें संगोपन आनी बरी जतनाय घेतल्यार तांचीं संज्ञानात्मक, भास, भावनीक वाड जावपाक शकता. मणिपालच्या ह्या भुरगीं दुयेंस उदरगत केंद्रांत विशेश जतनाय घेवपाची गरज आशिल्ल्या भुरग्यां खातीर खासा प्रशिक्षीत वेवसायिकां वतीन मार्गदर्शन करतले. ते खातीर जाय आशिल्ल्यो सगल्यो सुविधा ह्या केंद्रांत उपलब्द करून दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
