भांगरभूंय | प्रतिनिधी
मडगांव, प्रतिनिधी ः मडगांव पुलीस मुख्यालयाच्या मुखार आदल्या बस स्टॉपाचे सुवातेर खावपाचे स्टॉल्स लावपाक पालिकेन परवानगी दिल्या. पूण थंय पुलिसांनी जप्त केल्ल्यो, अपघातांत सांपडिल्ल्यो गाडयो दवरल्यात. थंय कोयराची रासूय मारतात. तशेंच खावपाचे जिन्नस विकपा वेळार घाणयारे उदकूय तेच सुवातेर ओतयतात. हांगां हुंदीर, सुणीं भोंवतात. ह्या हळशिकावण्या वातावरणांत जिनस तयार करप, विकप सगळें चालूच आसता. पालिका, भलायकी विभाग आनी गोवा कॅनान पळोवणी केल्यार कांय दीस नितळसाण पाळटात. पूण रोखडीच हळशीक परत पळोवपाक मेळटा. हे सुवातेर नितळसाण दवरपाची सुचवणी संबंदीतांक करपाची गरज आसा.
थळाव्या दुकानकारांचेर परिणाम
मडगांव पालिका वाठारांत खुबश्या सुवातांचेर दुसर्या राज्यांतल्यान आयिल्ले भोंवून आपलें सामान विकपी विक्रेत्यांची वाड जाल्या. हाचो परिणाम थळाव्या विक्रेत्यांचेर जाता. चोरबाजार बंद करपा वांगडा मडगांव पालिकेच्या कुशीक सांजेवेळार भरपी वस्तू विक्रीचो बाजार बंद जावपाची गरज आसा. तशेंच मडगांवां वांगडा आशिकुशीच्या गांवगिर्या वाठारांनी विक्रेते रस्त्यांचेर बसून विक्री करता. तांकां मार्केटांत योग्य जागो आनी सुविधा मेळपाची गरज आसा. अशें केल्यारूच गांवगिरे उत्पादक स्वयंपूर्णतेचे दिकेन फुडें सरतले, अशें एका तरणाट्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
