भांगरभूंय | प्रतिनिधी
मडगांव, प्रतिनिधी : मडगांव पालिका वाठारांत कोयरा सयत हेर जायत्यो समस्या आसात. कोयराचो योग्य विलो, बेघरांचो वाडपी आंकडो हे सामान्यांचे जिणेचेर परिणाम करपी समस्यां कडेन राज्य सरकारान लक्ष दिवपाची गरज आसा.
सोनसडो हांगाच्या कोयराच्या प्रस्नाचेर न्यायालयांत सुनावणी सुरु आसा. सोनसड्या वयलो कोयर साळगांवां आनी काकोडेंच्या प्रकल्पांत व्हरपाची परवानगी न्यायालयान दिल्ल्यान सोनसड्या वयलो कोयर उणो जाता. मात सदां जावपी सुको कोयर उडोवपा खातीर पालिके कडेन जागो ना. कदंब बस स्टॅण्डा कडलो कोयर उखलपाच्यो सुचवण्यो न्यायालयान दिल्ल्यो. तशेंच पालिकेन बाणावली पंचायत वाठारांत वेस्टर्न बायपासा कडले सुवातेर कोयर व्हरून उडयल्ल्यान पालिके आड बाणावले पंचायतीन पुलीस कागाळ केल्या. कोयराची समस्या सोडोवपा खातीर नगराध्यक्ष दामोदर शिरोडकार आनी आमदार दिगंबर कामत राज्य सरकारकडेन चर्चा करतले, अशें म्हणलां. पूण कोयरा सयत हेरूय समस्या मडगांवां आसात.
बेघरांचो वाडपी आंकडो
बेघर, भिकारी भौवशीक सुवातांचेर रावतात. भायल्या राज्यांतल्यान आयिल्ले बेघर तशेंच भिकारी मडगांवचें रेल्वेस्टेशन, बस स्टॉप ह्या भौशीक सुवातांचेर रावतात. तशेंच मडगांव पालिके मुखार आशिल्ले बागेचे भोंवतणीय खुबशे भिकारी दिसरात न्हिदतात तें पळोवपाक मेळटा. समाजीक संस्था जेवणाची वेवस्था केल्ल्यान भीक मागून, सोरो पियेवन हे भिकारी आनी बेघर मडगांवच्या भौशीक सुवातांचेर रावतात. सिग्नलाचेर भीक मागून वाहनचालकांक त्रास दितात. तांचे खातीर शेल्टर होमाची गरज आसा. जिल्होधिकारी कार्यालयान हाची नोंद घेवन हो प्रस्न सोडोवपाची गरज आसा. तशेंच ज्या राज्यांतल्यान ते आयल्यात थंय तांकां धाडून दिवपाची गरज आसा. ताका लागून शाराचे सुरक्षिततायेचो प्रस्नूय गंभीर जाला.
नवे ब्लॅक स्पॉट तयार जावपाचो भंय
ठेकेदार शारांतल्या घराघरांनी वचून कोयर एकठां करून लेगीत खुबश्या सुवातांचेर कोयराची रास पळोवपाक मेळटा. कांय सुवातांचेर कामगार कोयराक उजो लावन ताचो विलो लायतात. पोस्ट कार्यालय, मार्केटच्या लागसारचे रस्ते, फ्लायओव्हर लागसारची सुवात, रावणङ्गोंड हांगच्यान खारेबांध येवपी रस्त्या वांगडा शारांत विवीध सुवातांचेर ब्लॅक स्पॉट जातात. पालिका प्रशासनान वेळार हाची दखल घेवपाची गरज आसा. तशेंच साळ न्हंय राखपा खातीर ज्या व्हाळांत घाणयारें उदक सोडटात ताचे पळोवणी पालिकेन करून खर कारवाय करपाची गरज आसा.
लोंबकळपी केबल्स आनी पार्कींग प्रस्न
मडगांवां सोबितीकरणाच्या कामाक प्राधान्य दितात. हें करता आसतना शारांत सगळी कडेन केबल्स लोंबकळटना दिसता. केबल्स योग्य नियोजन करिनासतनाच घातिल्ल्यान तांचो गाडी चालकांक त्रास सोंसचो पडटा. तशेंच मार्केटांत येवपी नागरिकांक गाडयो पार्क करपाक जागो उपलब्ध ना. रेंट अ कार आनी रेंट अ बायक पालिका इमारतीच्या वटेन व्हरून लेगीत त्यो शाराच्या आशिकुशीच्या वाठारांत पार्क केल्ल्यो दिसतात. येरादारी खात्यान हाचे कडेन लक्ष दिवपा वांगडा रस्त्यार पार्क करपी गाडयांक क्लँपींग करपाची गरज आसा. पालिकेन आडखळून उरिल्ल्या पार्कींग प्रकल्पाच्या कामाक वेग दिल्या बगर हो प्रस्न सुटचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
