मडगांवकारांक जाप दिवपाक हांव जापसालदार ः दिगंबर कामत

भांगरभूंय | प्रतिनिधी

मडगांव: मडगांवकारांनी म्हाका आमदार म्हणून वेंचून दिला. जे मेरेन मडगांवकारांक हांव जाय ते मेरेन मडगांवकारां खातीर हांव आसा. कारण तांकां जाप दिवपाक हांव जापसालदार आसां अशें मडगांवचे आमदार दिगंबर कामत हांणी सांगलें. मडगांवां एके कार्यावळींत पत्रकारांनी विचारिल्ल्या प्रस्नाक तांणी वयली जाप दिली.  
ह्या वेळार उपनगराध्यक्ष दीपाली सावळ, नगरसेवक दामोदर शिरोडकार सगुण नायक आनी मडगांवचे नागरीक हाजीर आसले.
फाटलीं धा वर्सां हांव काँग्रेस पक्ष सोडून भारतीय जनता पक्षांत प्रवेश करपाचो आसां अशी चर्चा सुरू आसा. हांव दिल्ली गेलों जाल्यार कांय पत्रकार फोन करून म्हाका भारतीय जनता पक्षाचे मुखेल कचेरेंत तुमी रातीं 9 वरांचेर पत्रकार परिशद घेतले काय कितें अशें फोना वयल्यान विचारताले. 2022 वर्साचे विधानसभा वेंचणुके वेळार काँग्रेस पक्षाचे 17 आमदार सोडून गेले तेन्ना हांव काँग्रेस सोडून वतलों अशेंय कांय जाण उलयताले मात हांव पक्षा वांगडा रावलों, काम केलें. तें सगल्यांनी पळयलां अशें दिगंबर कामत हांणी सांगलें.  
मडगांव पालिकेंत आतां नगराध्यक्षाचो कार्यकाळ सोंपत आयला हे संबदान कामत हांकां विचारलें तेन्ना तांणी आपूण फातोड्डेंचे आमदार विजय सरदेसाय हांचे वांगडा बसून चर्चा करतलों म्हणपाचें सांगलें.
हांव सत्तेर आसूं वा नासूं, कांयच फरक पडना. मडगांवकारांचो तेंको जे मेरेन म्हाका आसा ते मेरेन म्हजे विशीं कोण कितें उलयता ताका हांव किंमत दिना अशेंय कामत हांणी सांगलें.