भांगरभूंय | प्रतिनिधी
फटीच्या आरोपा विशीं कारवाय करपाचेर चर्चा सुरू
पणजी : सरकारांतल्या मंत्र्याक कामा खातीर लाच दिल्ल्याचो आदले मंत्री पांडुरंग मडकयकार हांचो आरोप एकदम फटीचो. तांच्या आरोपांत कसलींच खरेंपणां नात. फाटीचो आरोप केल्ले खातीर तांचेर कडक कारवाय करपाची प्रक्रिया सुरू आसा, अशें भारतीय जनता पक्षाचे राष्ट्रीय सरचिटणीस तशेंच खासदार अरूण सिंह हांणी सांगलें.
अरूण सिंह हांणी पणजेच्या कार्यालयांत पत्रकार परिशद घेतली. ह्या वेळार तांचे वांगडा प्रदेश भाजप अध्यक्ष दामू नायक आनी राज्यसभा खासदार सदानंद शेट तानावडे हजर आशिल्ले. गोंय भेटीचेर आशिल्ले अरूण सिंह हांणी पदाधिकार्यांक मार्गदर्शन करपा वांगडा पक्षकार्या विशीं जाणून घेतलें.
फाटल्या सप्तकांत आदले मंत्री पांडुरंग मडकयकार हांणी एका कामा खातीर मंत्र्याक १५ ते २० लाख रूपयांची लाच दिल्ल्याचो आरोप केल्लो. पक्षाचे राष्ट्रीय सचीव बी. एल. संतोष हांची भेट घेतले उपरांत तांणी हो आरोप केल्लो. ‘भाजप सरकारांत लूट सुरू आसा. आदल्या मंत्र्याकूच कामा खातीर लाच दिवपाची वेळ येता जाल्यार सामान्य मनशाची स्थिती कितें आसतली?’ असो प्रस्न तांणी केल्लो. तांच्या जाहीर आरोपाक लागून पक्षांत, पक्ष वावुरपी आनी जनते मदीं बोवाळ निर्माण जाल्लो. पांडुरंग मडकयकार हांणी आरोप केल्ल्यान तांणींच नांवां सांगचीं, अशी प्रतिक्रीया मुख्यमंत्री डॉ. प्रमोद सावंत हांणी उक्तायल्ली.
महसूलमंत्री बाबूश मोन्सेरात, उद्देग मंत्री मॉविन गुदिन्हो, कृषी मंत्री रवी नायक हांचे सयत हेर मंत्र्यांनी लाच दिल्ल्या मंत्र्यांचीं नांवां सांगपाची मागणी केल्ली. उपरांत आतां पक्षाच्या केंद्रीय फुडार्यान आरोप फटीचे आशिल्ल्याचें सांगून आदले मंत्री मडकयकार हांचे आड कारवाय करपाक सांगली. हाका लागून ह्या प्रकरणाक आतां वेगळेंच वळण मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
