भांगरभूंय | प्रतिनिधी
गोंय विधानसभेचे 2027 चे वेंचणुकेक सुमार पावणेदोन वर्सां उरल्यांत. मुख्यमंत्री डाॅ. प्रमोद सावंत हांकां सरकारांतल्या मंत्र्यांक दुखोवपाचें ना. आतां मंत्रीमंडळ बदल करून व्हडलोसो लाव जावचो ना. पिराय, प्रगतीपुस्तक, लोकां कडेन जोडिल्लें नातें पळोवन कांय मंत्र्यांक उमेदवारी मेळची ना ही भाजपाची वेंचणूक निती लिपून उरुंक ना. चड तेंप आमदारकी, मंत्रीपद एकाच फुडाऱ्या कडेन उरिल्ल्यान मतदारां भितर लोकप्रतिनिधी विशीं तिडक (अँटी इनकम्बन्सी फॅक्टर) तयार जाता. ताचेरय उमेदवारी दितना विचार जाता हें विसरुंक जायना.
केंद्रांतल्या नरेंद्र मोदी सरकाराच्या येवजण्यांनी बदल करून त्यो लोकां मेरेन पावोवपाक गोंय सरकाराक येस मेळ्ळां, तें वेंचणुकेंत उपेगी. केंद्र, राज्य सरकाराची थिराय, थिरायेंतल्यान जावपी उदरगत, विरोधी फुडाऱ्यांची चार दिकांनी आशिल्लीं चार तोंडां प्रदेश भाजपाक 2027 त 27 मेरेन पावयतलीं. मंत्र्यांक मंत्रीमंडळांतल्यान कुशीक केलें ना तरी कांय मंत्री जागे जाल्यात. कांय मंत्री सवकासायेन मुखार वतात तांच्या खात्यांचो नियाळ जावचो. गरज थंय मंत्र्यांच्या खात्यांनी बदल घडोवन हाडचो, तांचे कडेन भासाभास करून. दोन मंत्र्यां पासत सरकारांत सुवात आसा, एके अस्तुरेक मंत्रीपद दिल्यार वेंचणुकेंत 2027 त 29 आमदार भाजपाक कित्याक मेळचे नात?
आयचें हें गोंयचें राजकी चित्र. चार पांच म्हयन्यांनी तातूंत व्हड बदल जावपाची शक्यताय ना. देवी लयराईचे एके घडणुकेन मुख्यमंत्र्यांक जागयलां, ते अती सादूर जाल्यात, उलयतनाय जतनाय घेतात, बेगीन फायली हातासतात. सदचे पिरंगणे परस तरणाट्यांक सरकार क्रियाशील जाल्लें भावता, आडमेळीं आयलीं तरी सरकार थांबलें ना, जाल्ल्यो चुको सुदारता. देखीक पणजेचें काजू फेस्त. लाखांनी न्हय पूण फेस्ताक समेस्त आयले, पावसाचे थेंबे आंगार घेत उमेदीन नाचले. पावसांत कला अकादमीन समेस्तांक आधार दिलो. काजू फेस्ता वेळार कला अकादमीतल्या पाॅप अप फेस्ताक गिरायक जालें. काजू फेस्ताच्या वेवस्थापनांत अंदूं बदलय जाल्ले पळोवंक मेळ्ळे. मुख्यमंत्री, भलायकी मंत्री एके माचयेर, उत्तर दक्षीणेचे आमदार, मंत्री तांचे बराबरीन समेस्तय उत्तर दक्षीणेचे. आयोजक रानां विकास म्हामंडळाच्यो अध्यक्ष आमदार देविया राणे वर्सा भितर बदल्ल्यात तें काजू फेस्त सांगतालें. तांचेर आनीक जापसालदारकी घालचीच पडटली, त्यो सरकाराक सांबाळपी. मंत्रीपद मेळ्ळें ना तरी सरकारा वांगडा आपूण आसा हें आपले हजेरेंतल्यान आमदार डाॅ. चंद्रकांत शेटये हांणी दाखोवन दिलां. पर्यटन मंत्री रोहन खंवटे, कला आनी संस्कृती मंत्री गोविंद गावडे मतदारसंघांत उदरगतींच्या वावरांत चडांत चड घुस्पून घेवंक लागल्यात. आमदार निलेश काब्राल मतदारसंघांत वावुरतात, आपले मतदार आपले वटेन उरतले हाची ते जतनाय घेतात. आमदार मायकल लोबो बार्देस म्हालांतल्या लागसारच्या मतदारसंघांचो अदमास घेवंक लागल्यात. भौशीक बांदकाम खात्याक शिटकावण्यो मेळिल्ल्यान खातें सुदारतलें, वेळार प्रकल्प पुराय करतलें अशी आस्त बाळगुया.
येरादारी सुदारून अपघात उणे करपाची मोख दवरून सरकाराक वावर करचो पडटलो. येरादारी खातें मुख्यमंत्री, भलायकी मंत्री बेस बरे सांबाळपाक शकतले. समेस्तांक विस्वास दिवप, पुलिसांतलो येरादारी फांटो क्रियाशील करप, अभ्यासांतल्यान आयिल्ल्यो सुचोवण्यो चालीक लावपाचो निर्णय घेवप रोखडेंच जावंक जाय. पंचायत, नगरपालिका खात्याच्या कायद्यांनी बदल जाल्यार, संगीत कदेलाचो खेळ थांबल्यार मॉन्सुना आदलें वादळ, पावसांतलें लुकसाण थांबतलें. पंचायत, नगरपालिका कायदे बळिश्ट करप, दोनूय स्वराज यंत्रणांक अनुदान दितना, लोकप्रतिनिधींचें मानधन वाडयतना शार, गांवांची जबाबदारी दिवप गरजेचें.
पंचायती, नगरपालिका कोयर वेवस्थापनांत कितल्यो जैतिवंत जाल्यात, नगरसेवक आपल्या प्रभागांत कितले दीस भोंवतात तें पावसांत दिसलां. पंच, नगरसेवक आपल्या प्रभागांनी भोंविल्ले, अधिकारी, कर्मचाऱ्यांच्या फाटल्यान लागिल्ले जाल्यार मॉन्सून सुरू जावचे आदीं आयिल्ल्या पावसांत खळयो, गटारां, ड्रेनेजी कित्याक व्हांवतल्यो? नागरिकांक नितळसाण शिकोवपाक पंच, नगरसेवक उणे पडटात, तांचे खातीर कार्यशाळा घेवपाक जाय. जिल्हो पांवड्यार अरिश्ट वेवस्थापन यंत्रणा आसात, तांकांय धांवडावपाक, येरादारीच्यो सुविधा दिवपाचे येत्न जाल्यात? पालिका, पंचायतींच्यो बसका पावसाळ्या आदीं कितल्यो जाल्यात? नगराध्यक्ष कितले वावुरतात? नगरपालिकां परस लागसारच्या गांवांनी लोकसंख्या वाडटा? नगरपालिका, पंचायती वाडोवपाक जाय? मंत्र्यांच्या खात्यांनी, प्रशासकी, खात्याच्या पावंड्या वेल्या अधिकाऱ्यांच्या बदलांतल्यान सरकाराक नव्यो येवजणी बांदूंक मेळटल्यो.
पावसांत वीज पुरवण सारकी करपाक गेल्ल्या कामगाराच्या मरणाची घडणूक कित्याक जाली? कामगारांक लायटीच्या धपक्या पसून राखण दिवपी बूट दिवंक नाशिल्ले? जाप ताकतिकेन मेळपाक जाय. भौशीक येरादारी बरी आसूनय गोंयांत स्कुटरी, मोटारसायकली, गाडयांचे तरणाट्यांक पिशें कित्याक? मंत्री तरणाट्यां मदीं जागृताय वर्साक कितले फावटी करतात?
खर दुयेंसां जाल्ल्या शिक्षकां प्रमाण मंत्रीय आत्र्या पयऱ्यान सुटयेर वतात? कामकाजाक न्याय्य दिवंक शकना जाल्यार खात्यांत म्हयन्या भितर बदल करचे. बदल केल्यार पंचायत, येरादारी खातीं स म्हयन्यां भितर सुदारतना दिसतलीं. चडशे अपघात कित्याक जातात? गाडयो धांवडायिल्ल्यान? ताकतीक कित्याक? उदरगतीचीं कामां येरादारीक आडमेळीं हाडपी? वेळाचे वेवस्थापन करूंक म्हाविद्यालयांत शिकयतात? वेवस्थापन, नियोजन (प्लॅनिंग) नवे पिळगेच्या जिवितांत खोसदिणे जावंक शकता. वेवस्थापन, नियोजन सरकारांत आसल्यार शिस्त येतली. तंत्रगिन्यानांतल्यान, कंप्युटर शिक्षण सक्ती केल्ल्यान सरकारी कामां सोंपीं जातात, भ्रश्टाचार उणो जावंक शकता. कितले मंत्री तेखातीर कर्मचाऱ्यांक उमेद दितात?
कमी शिक्षण घेतिल्ल्या मंत्र्यांक अधिकाऱ्यांचेर निंबून रावचें पडटा. वाॅटस अॅप मेसेज करुंक आयलें म्हळ्यार पुराय तंत्रगिन्यान मेळ्ळें अशें न्हय. शिक्षण कमी आशिल्ल्या मंत्री, आमदारांक कंप्युटर शिक्षण दिल्यार तांकां मुखेलमंत्री, खात्यांच्या मुखेल्यां कडेन वेव्हार ई मेलाचेर पत्रां वरवी करुंक मेळटलें.
तंत्रगिन्यानांतले बदल कमी शिक्षण घेतिल्ले, पिराय वाडत वचपी मंत्री, अधिकारी कितले शिकूंक शकतात? तांची बुद्धिमता, तांची चिंतपाची तांक कितली आसा? तंत्रगिन्यानातलें बरें, वायट तांकां समजता? नियाळ घेतल्यार मुख्यमंत्र्यांक मंत्र्यांचो चडसो वेव्हार तांचे खासगी सेवेंत आशिल्ले कर्मचारी करतात हें कळटलें.
पावसांतल्या विधानसभा अधिवेशना आदीं मंत्री, खात्याचें मुखेली,सचीव, सचिवालय, मंत्रालयांतल्या कामगारांच्या वावराची म्हायती एकठांय करची. दोन दीस अभ्यास केल्यार रिटायरमेंटाचे वाटेर आशिल्ले, तीन तीनदां सेवा वाडीचो लाव मेळिल्ले अधिकारी आदले वरी वावर करतात? तांच्या वावराक नेमावळ लागता? तांच्या कचेऱ्यांची, कचेऱ्यांतल्या कर्मचाऱ्यांची अवस्था कितें आसा? कर्मचारी बेजारल्यात? ह्या प्रस्नाच्यो जापो मेळटल्यो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
