भांगरभूंय | प्रतिनिधी
आमदार आर्लेकारांची जाहीर माफी मागपाची मागणी; आठ दिसांची मुजत, उपरांत कृती करपाची शिटकावणी
भांगरभूंय । प्रतिनिधी
पेडणेः भौशीक बांदकाम खात्याचे मंत्री निलेश काब्राल हांणी 5 एप्रीलाक पेडणें मतदारसंघाचे आमदार प्रवीण आर्लेकार हांकां वायट उतरां आनी दादागिरीची भासा वापरिल्ले खातीर पेडणें म्हाल नागरीक समितीन निशेध केला. पेडणें मामलेदारांक लेखी निवेदन दिवन त्या निवेदनाच्यो प्रती प्रधानमंत्री नरेंद्र मोदी, मुख्यमंत्री डॉ. प्रमोद सावंत आनी राज्यपाल हांकां धाडपाची प्रक्रिया सुरू केल्या. जर आठ दिसां भितर मंत्री काब्राल हांणी आमदार आर्लेकार हांची जाहीर माफी मागली ना जाल्यार आठ दिसां उपरांत फुडली कृती करपाची शिटकावणी समिती वतीन दिल्या. पेडणें म्हाल नागरीक समिती वतीन पेडणें मामलेदाराक निवेदन भेटयले उपरांत समितीचे वांगडी पत्रकारां कडेन उलयताले. ह्या वेळार समितीचे अध्यक्ष भारत बागकार, सदानंद वायंगणकार, साईनाथ आपुले, मनोहर तळवणेंकार हाजीर आशिल्ले.
मंत्री काब्राल हांणी आठ दिसां भितर थळावे आमदार आर्लेकार हांची जाहीर माफी मागली ना जाल्यार फुडली कृती थारावचे खातीर एक म्हत्वाची बसका आयोजीत करून वेगवेगळ्या मंत्र्यांचे बावले करून लासतले, अशीय शिटकावणी तांणी ह्या वेळार दिली.
सदानंद वायंगणकार हांणी सांगलें, लोकशायेच्या मार्गांतल्यान आमदार प्रवीण आर्लेकार हांकां लोकप्रतिनिधित्व मेळ्ळां. अशा लोकप्रतिनिधीचीं एका मंत्र्यान खेबाडां करप म्हणल्यार पुराय म्हालांतल्या लोकांचो अपमान करपा सारको आसा. 5 एप्रीलाक जी घडणूक घडली ती टीव्ही आनी प्रसार माध्यमांच्या रुपान सगळ्यांनी पळयल्या. मंत्र्यान जी भास वापरल्या ती योग्य ना. हाचे आड आमी लोकशायेच्या मार्गान कृती करतले.
पेडणें म्हाल नागरीक समितीन हे आदीं खूबशीं आंदोलनां केल्यांत, हाचो उगडास दवरचो. हे खेपे आंदोलन करपाचो वेळ मंत्री आनी राजकारण्यांनी हाडचो न्हय. हे उपरांतूय जर असोच प्रकार चालू उरलो जाल्यार देवांक भौशीक गाराणें, बावले करून लासप, ही प्रक्रिया सुरू करतले. आपणाक मानान जगपाक दिनात, सन्मानाची वागणूक दिनात, हे जें मेरेन दिसत रावतले ते मेरेन पेडणें म्हाल नागरीक समिती आपलें काम करीत रावतली, अशें वायंगणकार हांणी सांगलें. चुकून लेगीत पेडणेंच्या लोकांक गृहीत धरूं नाकात. उदकाचो विशय गंभीर आसा आनी ह्या विशयाचेर चर्चा करचे खातीर सरकारान आदीं लोकांक उदक दिवचें, आमदाराक मानाची वागणूक दिवची, अशीय तांणी मागणी केली. साईनाथ आपुले हांणी सांगलें, लोकप्रतिनिधी म्हणल्यार पुराय मतदारसंघाचो लोकप्रतिनिधी आसता. ज्या वेळार एकाद्या राज्याचो मंत्री आमदारा वांगडा चर्चा करता, तेन्ना थळावे सरपंच, उपसरपंच, पंच, अधिकारी लेगीत हाजीर आसतात. त्या वेळार मंत्र्यान मान- सन्मान सांबाळून उलोवचें. दादागिरीची, उणाक उतरां वापरची न्हय. हे घडणुकेचो आपूण निशेध करतां.
मंत्र्यान केला पेडणेंकारांचो अपमानः बागकार
5 एप्रीलाक मंत्री निलेश काब्राल हांणी आमदार प्रवीण आर्लेकार हांचे कडेन उलयतना जीं वायट उतरां वापरल्यांत, तें सोबासारके नात. एक भायलो मंत्री येवन आमच्या आमदाराचो अपमान करता, म्हणल्यार तो पुराय पेडणें मतदारसंघांतल्या लोकांचो अपमान करता. आठ दिसा भितर मंत्री काब्राल हांणी हे घडणुकेची तशेंच आमदार आर्लेकार हांची जाहीर माफी मागची. तांणी हो विशय आनीक वाडोवचे न्हय, अशें मामलेदाराक भेटयल्ल्या निवेदनांत म्हणलां, अशें पेडणें म्हाल नागरीक समितीचे अध्यक्ष भारत बागकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
