भांगरभूंय | प्रतिनिधी
मंत्रीपद कोणाक दिवप हो मुख्यमंत्र्यांचो अधिकार : सी टी रवी
भांगरभूंय I प्रतिनिधी
पणजी : काँग्रेसींतल्यान भाजपांत प्रवेश केल्ले, आठूय आमदार भाजपांत समाधानी आसात. मंंत्रीमंंडळाची फेररचणूक वा कोणाक मंंत्रीपद दिवप हो मुख्यमंंत्र्यांंचो खासा अधिकार आसा, अशें भाजपाचे गोंयचे प्रभारी सी. टी. रवी हांंणी सांंगलें.
भारतीय जनता पक्षाच्या सुकाणू समितीची बसका जाली. हे बसकेंत प्रभारी सी. टी. रवी हांंणी वांटो घेतिल्लो. सुकाणू समितीचे बसकेक मुख्यमंंत्री डॉ. प्रमोद सावंंत, प्रदेश अध्यक्ष सदानंंद शेट तानावडे, मंंत्री तशेंच आमदार हाजीर आशिल्ले. मंंत्रीमंंडळ फेररचणुके विशीं मुख्यमंंत्री डॉ. प्रमोद सावंंत हांंणी मात कितेंच उलोवंक ना.
मंंत्रीमंंडळ फेररचणुके विशीं मुख्यमंंत्री पक्षाच्या फुडाऱ्यांं कडेन चर्चा करतात. मतांं जाणून घेतात. निमणो निर्णय मात मुख्यमंंत्र्यांंनी घेवपाचो आसता. मंंत्रीमंंडळाची फेररचणुकेचो योग्य वेळार मुख्यमंंत्री निर्णय घेतले, अशें तांंणी सांंगलें.
दिगंंबर कामत, मायकल लोबो, डिलायला लोबो, राजेश फळदेसाय, अालेक्स सिक्वेरा, संकल्प आमोणकार, रूडाल्फ फर्नांडीस आनी केदार नायक ह्या आमदारांंनी तीन म्हयन्यां पयलीं वेगळो गट करून भाजपांत प्रवेश केल्लो. भाजपांत प्रवेश करतना किमान दोन आमदारांंक मंंत्रीपदां मेळटलीं, अशी चर्चा आशिल्ली. तीन म्हयने जावन गेले, तरी अजून कोणाकूच मंंत्रीपद वा लावाचें पद मेळूंक ना. कांय दिसांं पयलीं सुभाष फळदेसाय आनी निळकंंठ हळर्णकार हांंचें मंंत्रीपद वतलें, अशी चर्चा आशिल्ली. प्रधानमंंत्री नरेंंद्र मोदी हांंणी गोंयाक भेट दिवन मोपा विमानतळाचें उक्तावण केलें. प्रधानमंंत्र्यांचे भेटी उपरांत मंंत्रीमंंडळाची फेररचणूक जातली, अशो बातम्यो दिसाळ्यांंनी आयिल्यो. मंंत्रीमंंडळ फेररचणुके विशीं मात अजून कसल्योच हालचाली ना.
हे फाटभुंयेर पक्षाच्या सुकाणू समितीचे बसकेक महत्व आयलांं. मंंत्रीमंंडळा विशीं बसकेंत चर्चा जावंंक ना, अशें सी टी रवी हांंणी सांंगलें. संंघटणा घटमूट करपाचेर बसकेंत चर्चा जाली. खण वेवसाय सुरू जावपा खातीर पावणेची प्रक्रिया सुरू जाल्या. खण बंंदी तशेंच टॅक्सीच्या प्रस्नाचेर चर्चा जाली, अशें तांंणी सांंगलें.
लोकसभा वेंचणुकेची तयारी सुरू : मुख्यमंंत्री
वर्सा उपरांंत लोकसभेची वेंचणूक जातली. लोकसभा वेंचणुकेंत दोनूय सुवातो जिखपाचें पक्षाचें उद्दिश्ट आसा. संंघटणेन कशे प्रकारान काम करचें, हाची चर्चा बसकेंत जाली. राज्य तशेंच केंंद्रांतलें भाजप सरकार अंंत्योदय तत्वाचेर काम करता. येवजण्यांचो लाव सगल्यांक मेळचो म्हूण सरकार तशेंच संंघटणा वावर करता. हाचो लाव निश्चीत लोकसभा वेंचणुकेंत जातलो, अशें मुख्यमंंत्री डॉ. सावंत हांणी सांंगलें. मंंत्रीमंंडळ फेररचणुके विशीं मात तांंणी कितेंच उलोवंक ना.
दुष्यंतकुमार गौतम गोंयांत दाखल
प्रभारी सी. टी. रवी हांचे उपरांत भाजपाचे राष्ट्रीय सरचिटणीस दुष्यंतकुमार गौतम मंगळारा गोंयांत दाखल जाले. लोकसभा वेंचणुकेचे तयारी खातीरूच आपूण गोंयांत अायला. राज्यांतले भाजप आमदार, फुडारी तशेंच कार्यकर्त्यां कडेन बसका घेवन पक्ष संघटणा घटमूट करपाचेर आपूण भर दितलो, अशें तांणी पत्रकारां कडेन उलयतना सांगलें. फुडल्या कांय म्हयन्यांत भाजपाचे नामनेचे फुडारी गोंय भेटेर येतले, अशेंय तांणी सांगलें.
मंंत्रीमंंडळ फेररचणुकेक विरोध
सध्याचें सरकार आनी मंंत्री बरो वावर करतात. सध्या तरी मंंत्रीमंंडळांत फेरबदल नाका, अशें मत बसकेंत उक्तायिल्ल्याची म्हायती गोपांनी दिली. मंंत्रीमंडळ फेरबदलाक मंंत्री तशेंच आमदारांंनी विरोध केला.
आयज मंत्रीमंडळ बसका
राज्य मंत्रीमंडळाची बसका बुधवारा सकाळीं पर्वरे जातली. बसकेंत प्रलंबीत प्रस्नांचेर चर्चा जावन तांकां मान्यताय मेळपाची शक्यताय आसा. थळाव्या टॅक्सी धनयां खातीर सरकारा वतीन सुरू करपी गोवा टॅक्स अॅपाक बुधवारचे बसकेंत मंत्रीमंडळा कडल्यान मान्यताय मेळपाचीय शक्यताय आसा. ते भायर ध्वनी प्रदूशणा विशीं चर्चा जातली, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
