भांगरभूंय | प्रतिनिधी
गोमंत विभूशण पुरस्काराचे कार्यावळीक आसतले मानाचे सोयरे
भांगरभूंय । प्रतिनिधी
पणजी : मंत्रीपदा खातीर दिगंबर, मायकल, संकल्पाच्या नांवांची चर्चा आसली तरी सभापती रमेश तवडकार हांचें नांव मुखार आसा. तवडकार हे एसटी समाजाचे फुडारी आशिल्ल्यान तांचो सगल्यांत पयली सोपूत सुवाळो जातलो, अशें संकेत मेळटात. मुख्यमंत्री योग्य वेळार निर्णय घेतले अशें प्रदेश अध्यक्ष दामू नायक हांणी हे विशीं उलयतना सांगलें.
पक्ष वा मुख्यमंत्र्यांनी आपणाक अजून मेरेन मंत्रीपदाची कसलीच कल्पना दिवंक ना, अशें सभापती रमेश तवडकार हांणी सांगलें. गोविंद गावडे हांचें मंत्रीपद वतले ही चर्चा जशी खूब दीस चलिल्ली तशेंच रमेश तवडकार हांकां मंत्रीपद मेळपाची चर्चा लेगीत खूब दिसां सावन सुरू आसा. सध्या मंत्रीपदा खातीरची एकूच सुवात रिती आशिल्ल्यान पयलीं एकाचोच सोपूत सुवाळो जातलो, अशी म्हायती गोपां कडल्यान मेळ्ळ्या. गोमंत विभूशण पुरस्कार भेटवण कार्यावळ मंगळारा 24 जूनाक कला अकादमींत जातली. हे कार्यावळीक मानाचे सोयरे म्हूण हेरां सयत सभापती रमेश तवडकार हांकां निमंत्रीत केल्यात. कला आनी संस्कृती मंत्र्यां बदला रमेश तवडकार हांकां निमंत्रीत केल्यात. दर वर्सा गोमंत विभूशण पुरस्कार भेटवण कार्यावळ जाता. मुख्यमंत्र्यां सयत कला आनी संस्कृती मंत्री कार्यावळीक हाजीर आसता. सभापतीक सहसा निमंत्रण नासता. हे खेपे केंद्रीय मंत्री श्रीपाद नायक, खासदार सदानंद शेट तानावडे, विरोधी पक्ष फुडारी युरी आलेमांव हांचे सयत सभापती रमेश तवडकार हांकां निमंत्रात केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
