भांगरभूंय | प्रतिनिधी
नागरिकांनी उक्तायली तिडक, ख्यास्त दिली कडक
हरमल, बातमीदार: हरमलच्या दर्या वाठारांतली कोयराची समस्या पयस करपा खातीर पंचायत आनी कोयर वेवस्थापन समिती वावुरता. मात कांय जाण मेळटा थंय कोयर उडोवन हो वाठार बुरसो करता. काल हरमलच्या जागृत नागरिकांनी बिगर गोंयकार वेवसायीकांक धरून समितीचे सुवाधीन केलें.
हे विशीं चड म्हायती प्रमाण, काल सकाळीं सुमार ११ वरांचेर नानोस्कारवाड्यार एका बिगर गोंयकार वेवसायीकान आनी ताचे वांगडा आशिल्ले एके बायलेन सुमार ५० किल कोयर हाडून उडयलो. हें वाड्यावयल्या एका तरणाट्यान पळयलें आनी तांची गाडी आडावन दवरली. त्या दोगांयनी ह्या वेळार बरोच बोवाळ केलो. मात, पंच वांगडी आनी समितीच्या वांगड्यांनी थंय येवन ताचे कडेन चर्चा केली आनी दोगांय कडल्यान तो वाठार नितळ करून घेतलो. तशेंच भौशीक वाठाराची वाट लायल्यार दंडात्मक कारवाय करतले अशें समितीचे अध्यक्ष समीर कुडव हांणी सांगलें.
मजगतीं, त्या धरिल्ल्या बिगर गोंयकार व्यक्तीन थळाव्या आदल्या पंचाचें नांव सांगून थंयच्यान कूस मारपाचो यत्न केलो. पूण ग्रामस्थांनी ताका थंय आपोवन चवकशी केली. कोणायचेंय नांव सांगून बिगर गोंयकारान दादागिरी केल्ल्यान ग्रामस्थांक तिडक आयली आनी तांणी त्या दोगांय कडल्यान हो पुराय वाठार नितळ करून घेतलो. त्या दोगांय खातीर एके थळावे चलयेन मध्यस्थी करपाचो यत्न केलो, पूण तिचें कांय चलूंक ना.
वेवसायिकांनी सहकार्य करचें
हरमल पर्यटनस्थळ म्हणून फामाद आसा. ताका लागून वेवसायिकांनी हांगचो दरेक वाठार नितळ दवरपाक सहकार्य करचें, असो उलो पंच वांगडी सोनाली माज्जी हांणी मारलो.
कोयर एकठांय करपाची गाडी सदांच गांवांगांवांनी भोंवता. ताचो वेळ थळाव्यांक खबर आसा. तरीय अशे कोयर उडोवपाचे प्रकार घडटात. हाचे फुडें अशें घडल्यार ताचेर दंडात्मक कारवाय जातली, अशी शिटकावणी उपसरपंच अनुपमा मयेंकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
