भांगरभूंय | प्रतिनिधी
गोंय भूंय महसूल (जमनी वापराचें रुपांतर आनी बिगर शेतकी जमनीचें मोल) नेम, 1969 वर्सां सरकार जी दुरुस्ती हाडपाक सोदतालें, ताका सगल्यांनी खर विरोध करप गरजेचें आसा.
पयलें म्हणल्यार दुरुस्तीचो मसुदो फकत इंग्लीशींतल्यान मेळटा. ताचो कोंकणी आनी मराठी भाशेंत अणकार करून नागरिकांक दिवचो. हो मसुदो दोनूय जिल्होधिकारी कार्यालयां आनी गोंय सरकाराच्या संकेतथळार उपलब्ध करून दिवपाची गरज आसा. हरकत आनी सुचोवण्यो धाडपा खातीर दिल्लो 15 दिसांचो काळ फकत एक औपचारीकपण असून हो नेम मान्य करून राजपत्रांत उजवाडावपाक सरकार चडूच उतावीळ जाल्लें दिसता.
म्हज्यो हरकतीं सकयल दिल्ले प्रमाण आसात.
आयज गोंयची चडशी जमीन दिल्लीच्यो लाॅबी आनी भू माफिया बळकायत सुटल्यात. आमचे अधिकारी तांकां सामील बी आसात? मसुदो पळयल्यार तशेंच दिसता. हे दुरुस्तीचो वायट परिणाम कितें जातलो हाची कल्पना महसूल मंत्र्याक आसा व्हय?
आयज जमनीचें रुपांतर योग्य रितीन जातलें हें पळोवप म्हत्वाचें. नगर नियोजन, रान, मामलेदार आनी सर्वेक्षण खात्यां कडल्यान अहवाल 20 दिसां भितर मेळूंक ना जाल्यार अहवाला बगर जमनीचें रुपांतर करपाचो अधिकार जिल्होधिकाऱ्यांक आसतलो, अशें दुरुस्तीच्या मसुद्यांत म्हणलां. जिल्होधिकाऱ्याक दिल्ली ही सुट बेकायदेशीर आसून राज्याक ती सामकी जीवघेणी थारतली.
दुसरो मुद्दो म्हणल्यार, जमनीच्या रुपांतरा संबंदी नगर नियोजन, रान, मामलेदार आनी सर्वेक्षण खात्याचे अहवाल मेळोवपा खातीर सामान्य लोकांक कितले त्रास जातात, फावटी मारच्यो पडटात हाची कल्पना महसूल खात्याक ना? हीं सरकारी खातीं आपले अहवाल सहज आनी बेगीन दितात? म्हज्या अणभवा प्रमाण, रान खाते आनी शार नियोजन खातें अहवाल दिवपाक चड वेळ घेतात. जायते फावटीं नागरिकांक त्रास करपा खातीर थोडे अधिकारी, कर्मचारी मुद्दाम कळाव जाता. तुमचो रुपांतर अर्ज कायद्याक धरून नाशिल्ल्यान नगर नियोजन, रान, मामलेदार आनी सर्वेक्षण खात्या कडेन ‘सेटिंग’ करुन अहवाल धाडपाक मुद्दाम कळाव जावपाची शक्यताय सरकार न्हयकारूं शकता? भ्रश्ट अधिकाऱ्यांक धडाधड जमनींचें रुपांतर करपाची ही एक व्हड संद. हाका लागून भ्रश्टाचार वाडटलो.
सरकारान जमनी रुपांतर अहवालांचो आस्पाव कालबद्ध सेवा हमी कायद्यांत केला. म्हणजे थारावीक काळांत काम जावप. आयज मेरेन जिल्होधिकाऱ्यांक अहवाल धाडपाक कळाव केल्ल्या कितल्या अधिकाऱ्यांचेर कारवाय जाल्या? जाप ना जाल्यार, सरकार कालबद्ध सेवा हमी कायदो चालीक लावपाक शकलें ना, असो ताचो अर्थ जायना?
कोमुनिदादच्या आनी सरकारी जमनीचेर अतिक्रमण जावचें न्हय हे खातीर महसूल खात्यान पावलां उबारचीं. कोमुनिदाद आनी सरकारी जमनी सांबाळपाक सरकार कसलोच कायदो वा सुदारणा हाडपाचो यत्न कित्याक करीना? कूळ- मुंडकारांक न्याय दिवपाक कायद्यांत दुरुस्ती कित्याक करीना?
‘व्यवसाय सुलभताय’ (ईज ऑफ डूयिंग बिझनेस) ह्या सोबीत नांवा खाला उरिल्लें गोंय रियल इस्टेट लॉबीच्या तोंडांत वतलें. म्हजी उतरां बरोवन दवरात.
सदानंद एम. रायकार
कोलवें- साश्टी
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
