भांगरभूंय | प्रतिनिधी
-सूचनान खुनाचो आरोप न्हयकारलो
पणजीः आवयन आपल्या चार वर्सां पिरायेच्या पुताचो खून केल्ले प्रकरणाची चर्चा सध्या देशभर चालू आसा. ह्या प्रकरणांत दर दिसा नव्यो गजाली मुखार येतात. चार वर्सां पिरायेच्या पुताचो खून केल्ल्यान ताब्यांत आशिल्ली आर्टिफिशियल इंटेलिजन्स कंपनीची धनी आनी सीईओ सूचना सेठ हिणें खुनाचो आरोप न्हयकारलो. पुताचो खून आपूण करुंक ना, ताका न्हिदिल्ल्या जाग्यार सैमीक मरण आयलें अशें ती पुलिसांक सांगता.
म्हापशें न्यायालयान सूचनाक 6 दिसांची पुलीस कोठयेंत दवरपाचो आदेश दिला. कळंगूट पुलीस ह्या प्रकरणाची दरेका अँगलान चवकशी करतात. पूण पुलीस तपासाक सूचना सेठ सहकार्य दिना. पोस्टमार्टम अहवालांत स्वास घुस्पटिल्ल्यान मरण आयिल्ल्याचें नमूद केलां. त्या भुरग्याचें तोंड आनी छाती सुजिल्ली आनी नाकांतल्यान रगत येतालें. भुरग्याच्या आंगाचेर रगत येवपाची वा संघर्श करपाचीं लक्षणां दिसूंक नात अशें कर्नाटकांतल्या हिरियुर म्हाल हॉस्पिटलाचे प्रशासकीय अधिकारी डॉ. कुमार नायक हांणी दोन दिसां आदीं पत्रकारां कडेन उलयतना सांगिल्लें. पूण, चिन्मयाक मरण येवपाचें कारण सैमीक आशिल्ल्याचे सूचनान पुलिसांक सांगलें.
मजगतीं, सिकेरी ज्या हॉटेलांत तिणें पुताचो खून केल्याचो दुबाव आसा थंय शुक्रारा तिका व्हरून त्या दिसा नेमकें कितें घडलें तें सोदून काडपाचो यत्न कळंगूट पुलीस करतात.
सूचना सेठ आनी तिचो घोव व्यंकटरामण हांचे मदलो घरगुती वाद आनी भुरगो कोणाच्या ताब्यांत घेवपाचो हाचे वयल्यान सूचनान आपल्या पुताचो खून केल्ल्याचो दुबाव पुलिसांक आसा. हाचे पयलीं तिणें आपल्या घोवाचेर घरगुती, मानसीक छळ आनी त्रास दिवपाचो आरोप केला. बंगळुरूच्या न्यायालयांत हे विशीं सुनावणी चालू आसा. पूण सूचनाच्या घोवान हे सगळे आरोप न्हयकारल्यात.
पुलिसा कडल्यान घडणुकेचो ‘क्रायम सीन रिक्रिएट’
सूचना सेठ हिका अटक जाले उपरांत तीन दिसांनी पुलीस तपासाक सहकार्य केले. अापल्या चार वर्सांच्या भुरग्याची हत्या केल्ल्याचो आरोप तिचेर आसा. शुक्रारा कळंगूट पुलिसांनी सूचना हिका कांदोळेंतल्या त्या गेस्ट हावसांत व्हरून ते दिसाच्या घडणुकेचो क्रायम सीन रिक्रियट करून घेतलो. त्या वेळार दुबावीत सुचनान पुलिसांक सहकार्य केले. तिणें स्वता जावन घडणुकेची म्हायती दिली. पूण खुून केल्ल्याची कबुली वा घटनाक्रम तिणें उक्तो करूंक ना. ह्या वेळार पुलिसांनी सूचना हिचेर कसल्याच प्रकारचो दबाव हाडूंक ना. तिका उलोवपाचे पुराय स्वातंत्र्य आनी मेकळीक दिली. ह्या वेळार पुलीस निरिक्षक परेश नायक, बायलां उपनिरिक्षक प्रगती मळीक आनी हेर पुलीस हजर आशिल्ले.
सगले सबळ पुरावे सूचना हिच्या विरोधांत
-दुबावीत सूचना सेठ ही आपूणच भुरग्याचो खून केलो, हे कबूल करिना. पूण परिस्थिती आनी सबळ पुरावे तिचे विरोधांत आसात. शेनवारा 6 वेर रातीं 11.30 वराच्या सुमाराक ती कांदोळेंतल्या गेस्ट हावसांत भुरग्यां वांगडा आयिल्ली. विमानान ती मोपा विमानतळा वयल्यान गोंयांत आयिल्ली. ह्या विमानाचे तिकेट तिणें स्वता बूक केल्ले. गेस्ट हावसांत चेक-इन केले पसून ती एकलीच भुरग्या वांगडा रावताली. भायली दुसरी कोणूच व्यक्ती तिचे कुडींत वचूंक ना. भुरग्याची कूड आशिल्ल्या बॅगे सयत ती पुलिसांक रंगेहात मेळ्ळी. ते खातीर सगले सबळ पुरावे तिचे विरोधांत आसात. पुलिसांक मेळिल्ल्या सुसायड नोटींत तिणें भुरग्याचो खून कित्याक केलो, हे विशीं नमूद केला. ह्या सगल्या मुद्द्यां प्रमाण पुलीस तिचे आड न्यायालयांत आरोपपत्र दाखल करतले.
– शेनवारा सूचनाचो घोव वेंकटारमण हो गोंयांत दाखल जातलो. ताका पुलिसांनी चवकशे खातीर येवपाक समन्स जारी केला. जाल्यार शेनवारा सूचना हिका परतून गोमॅकाँत वैजकी तपासणे खातीर व्हरतले.
– दुबावीत सूचना सध्या 6 दिसांच्या पुलीस कोठयेंत आसा. ह्या काळांत तिणें नाश्टा, जेवण वेवस्थीत घेतले.
– पुलिसांनी भुरग्याचो व्हिसेरा राखून दवरिल्लो. तो वेर्णा फॉरेन्सीक लॅबांत धाडला. तीन म्हयन्यांनी हाचो अहवाल अपेक्षीत आसा. ह्या अहवाला उपरांत तिणें भुरग्याक गुंगी येवपाक कफ सिरप दिल्ले वा ना, हे स्पश्ट जातले.
पोस्टमार्टेम अहवालांत खून केल्ल्याचे स्पश्ट
-भुरग्याच्या पोस्टमार्टेम अहवालांत स्वास घुस्पटिल्ल्यान मरण आयिल्ल्याचे नमूद केला.
-भुरग्याचो चेरो आनी छाती फुगिल्ली, नाकांतल्यान रगत व्हांवताले. भुरग्याच्या कुडीचेर हेर कसल्योच घाये नाशिल्ले, अशें कर्नाटकांतल्या हॉस्पिटलाचे प्रशासकीय अधिकारी डॉ. कुमार नायक हांणी स्पश्ट केल्ले.
– आतां सूचना आपूण भुरग्याचो खून करूंक नाशिल्ल्याचे सांगता. ताका लागून पुलीस गोंदळांत पडल्यात. सूचनान फटींग उलोवपाच्या कारणांचो सोद घेवपाक पुलिसांनी सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
