भांगरभूंय | प्रतिनिधी
नोव्हेंबराची 14 तारीख म्हणलें काय सगळ्यांत पयलीं दोळ्यां सामकार येता तो भारताचे पयले प्रधानमंत्री पंडित जवाहरलाल नेहरू हांचो वाडदीस. भुरग्यांचे हक्क, शिक्षण, कल्याण हांचे विशीं जागृताय करपाक भारतभर हो दीस बालदीस म्हूण मनयतात. तो मनोवपा फाटलीं कारणां आनी फाटभूंय सगळ्यांक खबर आसतलींच. तातूंत हांव आनी चड भर घालना. ‘भुरगीं हें भारताचें बळगें’ अशें पंडित नेहरू हांचें मत आशिल्लें. तांच्या ह्या मताक, म्हजो पुराय तेंको. तुमचोय आसतलोच हातूंत कसलोच दुबाव ना.
बालदीस म्हणलें उपरांत सगळ्यांत पयली खोस परजळटा ती भुरग्यांच्या मुखामळार. कारण ह्या दिसा तांकां शाळेचे युनिफोर्म सोडून मेकळेपणान आपले आवडीचे कपडे घालपाक मेळटात. त्या भायर शाळेंत खासा चॉकलेट आनी हेर जिनस लेगीत खावपाक मेळटात. हें याद बरयतना म्हाका म्हज्या भुरगेपणाची याद जाली. कोणाक जावची ना? शाळेंत आसतना आमी लेगीत बालदिसाची आतुरतायेन वाट पळयताले, खासा हांव तर बालदिस निमतान कितें विशेश आसा हे खातीर न्हय तर चॉकलेटी खावपाक मेळटा म्हूण शाळेंत वतालो. तेन्ना ल्हान आशिल्ल्यान आमका बालदिस नेमको कितें हाची जाणीव नासली, आयचे पिळगेंक लेगीत थोड्या भितर आसत आनी नासत. हातूंत त्या माणकुल्या भुरग्यांची कांयच चूक ना. कारण आमी तांकां त्या दिसा विशीं, तो कित्याक बालदीस म्हूण साजरो करता हें केन्ना सांगूकच ना. फकत भारताचे पयले प्रधानमंत्री पंडित जवाहरलाल नेहरू हांच्या वाडदिसा निमतान भुरग्यां विशीं आपलो मोग व्यक्त करप होच हाचो हेतू काय असोय केन्ना केन्नाय प्रस्न पडटा.
ह्या सगळ्या गजाली आड आमी मुखेल गजाल विसरतात, भारतांत गरिबी, भुरग्यांचो शोशण करपाचे प्रकार खूब वाडल्यात. भुरग्यां आड साबार केशी पेंडींग लेगीत आसात, तांकां न्याय मेळटलो काय? मुखेल गजाली कडेन वळटना भारतांच्या दर राज्याच्या खूबश्या वाठारांनी आमकां गरिबी दिश्टी पडटा आनी हातूंत चड प्रमाणान भुरगीं. तांचो हातूंत दोश आसा काय? शिक्षणीक मळार आमचो भारत देश उदरगतीचीं पावलां चडटा, ही खरी गजाल, पूण ह्या गरीब भुरग्यांक शिक्षणीक मळार कसलोच आदार मेळना काय? काय तांचे कडेन सरकार दुर्लक्ष करता, हो मोठो प्रस्न. साबार वर्सां सावन हीच परिस्थिती आमकां पळोवंक मेळटा. एके वटेन ‘भुरगीं हें भारताचें बळगें’ हो विचार आयज खंय तरी शेणलां अशें दिसून येता. सगळ्यांची परिस्थिती तितलीं बळीश्ट नासता हें मान्य, पूण आयचे परिस्थीतीक तोंड दिवन फुडाराक ती बदलपाची गरज आसा.
आयचे पिळगेक खासा भुरग्यांक गरिबी कडल्यान पयस करून तांका योग्य शिक्षण दिवन तांचो फुडार बदलू येता. हो हेतू बाळगून भारताची गरिबी पयस करू येता. हाच्या उरफाटे आयच्या भुरग्यांनी शिक्षणाचें म्हत्व पुराय तरेन जाणून घेवपाची खूप गरज आसा. अशे जालें जाल्यार पंडित जवाहरलाल नेहरू पळयल्लो ‘भुरगीं हें भारताचें बळगें’ हो हेतू पुराय तरेन साकार जावपाक चड वेळ लागचो ना.
विष्णू नार्वेकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
