भांगरभूंय | प्रतिनिधी
पुराय भारत देशांत 14 नोव्हेंबर हो दीस बालदीस म्हूण मनयतात. हो सगळ्या भुरग्यां खातीर उमेदीचो तशेच खुशालकायेचो दीस. ह्याच दिसा पंडित जवाहरलाल नेहरू हांची जयंती जावन आसा आनी ताका लागून ह्या दिसाक एक आगळे वेगळें अशें म्हत्व आसा. हे दीस खुपश्या शाळांनी तरेकवार कार्यावळी जातात. कांय कडेन वेगवेगळयो सर्तीय घेतात. तशेंच भुरग्यांक भेटवस्तूय दितात. पंडित नेहरू हांचो जल्म 14 नोव्हेंबर 1989 ह्या दिसा जालो. पंडित नेहरूक सगळी भुरगीं मोगान चाचा नेहरू अशें म्हणटालीं. चाचा नेहरूंक भुरगीं खूप आवडटाली. आनी तांचो भुरग्यांचेर खूप जीव आशिल्लो. भुरगीं म्हळ्यार देवा घरची फुलां अशे तांचे मानप आशिल्लें.
पंडित नेहरू जरी प्रधानमंत्री आशिल्ले तरी ते आपले वेळ भुरग्या वांगडा घालयताले. आपलो वाडदीस आसतालो तेन्ना ते भुरग्यांक बऱ्यो – बऱ्यो चॉकलेटी, तरेकवार खाणाच्यो वस्तू वाट्टाले. भुरग्यांक वेगवेगळ्या रंगांचे बोमाडे वाटपाकुय तांका खूप आवडटालें. भुरगीं देवाची सुंदर निर्मिती अशे तांका सदांचं दिसचें. भुरगीं ही आमच्या देशाचो फुडार जावन आसा देखून तांचो सर्वांगीण विकास जावपाक योग्य तीं पावलां उचलप ही काळाची गरज जावन आसा अशे तांका सदांच दिसतालें. देशाचो फुडार बरो करतले जाल्यार भुरग्यांक सदांच पयलें प्राधान्य दिवचें अशे तांचे मत आसलें. बरें शिक्षण, बरे गूण, बरे संस्कार भुरग्यांक ल्हानपणा पासुनूच दिवचे अशे तांचे मानप आसलें. भुरग्यांकूय नेहरूजी कितले आवडटाले हें ह्या प्रसंगातल्यानं दिसून येता.
असोच एक प्रसंग. चाचा नेहरू दिल्लीत सरकारान दिल्ल्या घरांत रावताले. हे घर खूप सुंदर आशिल्लें. सभोवतणी तरेकवार फुलांचीं झाडां आशिल्लीं. पंडीतजींक फुलां खूप आवडटाली. थंयच एक सुंदर अशे जार्दीन आशिल्लें. त्या दिसा पंडितजी थंय पासयो मारताले. इतल्यानं तांच्या कानार एक ल्हान भुरगें रडटा तो आवाज पडलो. तांका राव नजो जालें. ते त्या भुरग्याक हेवटेन तेवटेन सोदपाक लागले. सोदून सोदून भुरगें एकदाचें मेळळें. भुरगें खूप ल्हान आशिल्लें. आपली आवय म्हऱ्यांत ना म्हूण तें रडटाले. पंडितजीन ताका वेंगेन धरलें आनी भुरगें रडपाचें थांबलें. हो देखाव पळोवन थंय आशिल्ले सगळे लोक अजापीत जाले. इतल्यान थंय भुरग्याची आवय आयली. आपल्या भुरग्याक पंडितजींचे वेंगेन पळोवन तिवूय अजापीत जाली. मागीर नेहरूजीन काडून त्या भुरग्याक ताचे आवयसरी दिलें. आवयन भुरग्याक धरिल्लें खरें, पूण ताची नदर फकत पंडीतजींचेरूच आशिल्ली आनी तें थंयचान वचसर फकत पंडीतजींक पळोवन हांसत आशिल्लें.
खरेंच त्या सान भुरग्याक सुद्दा पंडितजीची भुरग्या बद्दलची आशिल्ली माया कळपाक कळावं लागलो ना. भुरगीं जावन आसात देवा घरची फुलां.. तांका राखात सांबाळात. तांचे भुरगेपण फुलूं दी ते बावपाक दिव नाकात. सगळ्या भुरग्यांक बालदीसाची गोड गोड परबी.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
