भालोफेक नीरज, रोहीत फायनलींत

भांगरभूंय | प्रतिनिधी

ऑलिम्पीक चॅम्पीयन नीरज चोपडा आनी रोहीत यादव हांणी संवसारीक अॅथलेटिक्स वस्तादपण सर्तीचे भालोफेकाचे  फायनलींत सुवात मेळयली. ह्या दोगां खेरीत एल्डहोस पॉलान तिट्टी उडयेचे फायनलींत सुवात निश्चीत केली. संवसारीक अॅथलेटिक्स वस्तादपण सर्तीचे तिट्टी उडयेचे फायनलींत पावपी पॉल भारताचो पयलो खेळगडो थारलो. 

नीरज चोपडान भालोफेक पात्रताय फेरयेंत पयल्याच यत्नांत 88.39 मिटर स्कोर करून फायनलींत सुवात मेळयली. ते उपरांत रोहीतान 80.42 मिटर स्कोर करून क्वॉलिफिकेशन ग्रूप दोनांत पयल्या 11त सुवात मेळयत फायनलीची पात्रताय मेळयली. 

नीरजाचो वर्सांतलो हो तिसरो सर्वोत्कृश्ठ थ्रो आसा. झेक प्रजासत्ताकाच्या जाकुब व्हॅदलेच हाणें ताच्या फाटोफाट 85.23 मिटरा सयत फायनलींतली सुवात निश्चीत केली.

नीरजान राष्ट्रकूल खेळां सर्त, आशियायी खेळां सर्त आनी ऑलिम्पीक खेळां सर्त हातूंत भांगरा पदक जिखलां. आतां ताची नदर हे सर्तींत भांगरा पदक जिखपाचेर आसा.

जर तो फाल्यां भांगरा पदक जिखपाक येसस्वी थारता तर संवसारीक अॅथलेटिक्स सर्तींत भांगरा पदक जिखपी भारताचो पयलो दादलो खेळगडो थारतलो. 2003त पॅरिसांत जाल्ले सर्तींतल्या लांब उडी प्रकारांत अंजू बॉबी जॉर्जान कांश्या पदक जिखिल्लें. अशें करपी ती भारताची पयली खेळगडी थारिल्ली.

पॉलान तिट्टी उडयेचे क्वॉलीफिकेशनांत टॉप 12वी सुवात मेळयली. नीरज आनी रोहीत आयतारा पदका खातीर फायनलींत खेळटले. ही सर्त भारताच्या वेळा प्रमाण सकाळीं 7.05 वरांचेर सुरू जातली. जाल्यार पाउलाची फायनल 6.30 वरांचेर सुरू जातली.

24 वर्सां पिरायेच्या नीरजान कोंपराचे दुखापतीक लागून पोरूं सर्तींत वांटो घेवंक नाशिल्लो. तशेंच 2017च्या हंगामांत तो फायनलीक पात्र जावंक नाशिल्लो. ताणें त्या वेळार 82.26 मिटराचो स्कोर केल्लो.

मजगतीं, पाउल हाणें 16.68 मिटराच्या स्कोरा सयत फायनलींतली सुवात निश्चीत केली. तो टॉप 12चेर उरलो. भारताचे हेर जम्पर परवीन (16.49) आनी अब्दुल्ला अबोब्रेकर (16.45) वळेरेन 16वे आनी 19वे सुवातेर आयले.

अमेरिकेच्या ओरेगॉनांत चालू आशिल्ले सर्तीचे भालोफेक प्रकारांत वट्ट 34 खेळगड्यांनी वांटो घेतिल्लो. तांची दोन गटांनी विभागणी केली.