भांगरभूंय | प्रतिनिधी
भारताची भालोफेंक खेळगडी अन्नू राणीन सेगीत दुसरे खेपे संवसारीक अॅथलेटिक्स वस्तादपण सर्तीचे फायनलींत पावली. अन्नून अखेरच्या यत्नांत 59.60 मिटर भालोफेंक करीत फायनलींत सुवात मेळयली. अन्नून आपल्या पयल्या यत्नांत फावल केलो. जाल्यार दुसऱ्या यत्नांत 55.35 मिटर भालोफेंक केलो. ताका लागून तिचें आव्हान सोंपतलें अशें दिशिल्लें. पण, तिसऱ्या यत्नांत तिणें 59.60 मिटर भालोफेंक करून तिणें आपलें आव्हान कायम राखलें.
तिसऱ्या यत्नांत तिचो भालो 60 मिटर मार्काच्या फक्त 40 सेंटीमिटर फाटीं उरलो. ती पात्रताय फेरयेंत ग्रूप बी हातूंत पांचवे सुवातेर उरली. पात्रताय फेरयेंतल्या दोन गटांतल्यान सर्वोत्कृश्ठ आठ भालोफेंक खेळगडे फायनलींत पावले. तातूंत अन्नूचो आस्पाव आसा.
29 वर्सां पिरायेच्या अन्नू राणीच्या नांवाचेर भालोफेकींत राष्ट्रीय विक्रमाची नोंद आसा. पूण, तिका संवसारीक अॅथलेटिक्स वस्तादपण सर्तींत 60 मिटराचो मार्क गांठपाक तिका अपेस आयलें.
अन्नू आतां शेनवारां जावपी फायनलींत आपल्या प्रदर्शनांत सुदारणां करपाची गरज आसा. तिची 63.82 मिटर ही वैयक्तीक सर्वोत्कृश्ठ कामगिरी आसा. जाणें भालोफेंकींत 62.50 मिटराचो मार्क हुपला ताका ते थेट फायनलींक पात्र जाल्यात. अशे तिनूच खेळगडे थेट पात्र जाल्यात.
अन्नू सेगीत दुसरे खेपे संवसारीक वस्तादपण सर्तीचे फायनलींत पावली. तिची ही तिसरी संवसारीक वस्तादपण सर्त आसा. 2019 वर्सा दोहांत जाल्ले संवसारीक अॅथलेटिक्स सर्तींत तिणें 61.12 मिटर भालोफेंक करून फायनलींत सुवात मेळयिल्ली. 2017तले सर्तींत ती फायनली खातीर पात्र जावंक नाशिल्ली.
अन्नूच्या नांवाचेर 63.82 मिटर लांब भालोफेंक करपाचो राष्ट्रीय विक्रम आसा. मे म्हयन्यांत जमशेदपूरांत जाल्ले इंडीयन ओपन भालोफेंक सर्तींत तिणें राष्ट्रीय विक्रमा सयत भांगरा पदक जिखिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
