भांगरभूंय | प्रतिनिधी
भारताच्या हॉकी पंगडाक राष्ट्रकूल खेळां सर्तींत बळिश्ट ऑस्ट्रेलिये कडल्यान 7-0 अशा व्हडा फरकान हार घेवची पडली. हे हारीक लागून भारताक रुप्या पदकाचेर समाधान मानचें पडलें.
हे हारीक लागून राष्ट्रकूल खेळां सर्तींत भांगरा पदक जिखपाचें भारताचें सपन परतून एकदां भंगलें. हाचे आदीं 2010 आनी 2014त लेगीत भारताचो पंगड ऑस्ट्रेलिये आड फायनलींत हारिल्लो. ऑस्ट्रेलिये आड तिनूय राष्ट्रकूल खेळां सर्तीचे फायनलींत भारताक एकूय गोल करपाक जमूंक ना.
दुसरे वटेन ऑस्ट्रेलियेन ह्या जैता सयत राष्ट्रकूल खेळां सर्तींत सेगीत सातवे खेपे भांगरा पदक जिखलें. 1998 पसून एकाय पंगडाक ऑस्ट्रेलिये आड जैत जोडपाक जमूंक ना.
भारताच्या डिफॅण्डरांनी ऑस्ट्रेलियेचे दोन पॅनल्टी कॉर्नर अपेशी थारायले. पूण, तिसऱ्या यत्नांत ऑस्ट्रेलियेन गोल केलो. ब्लॅक गोवर्सान णवव्या मिनटाक पंगडाचें खातें उगडलें. नॅथन एपहार्मसान 14व्या मिनटाक फिल्ड गोल करून ऑस्ट्रेलियेची आघाडी 2-0 अशी केली.
22व्या मिनटाक जॅकब अॅण्डर्सनान पॅनल्टी कॉर्नराचेर गोल करून ऑस्ट्रेलियेचो स्कोर 3-0 केलो. चवथो गोल टॉम विकहॅमान 26व्या मिनटाक केलो. अॅण्डरसनान 27व्या मिनटाक आनीक एक गोल केलो.
डीप डिफॅण्डींगेंत भारत साबार चुकी केल्यो. ताकाच लागून भारताक पांच पॅनल्टी कॉर्नर मेळ्ळे. तीन पॅनल्टी कॉर्नर पयल्या 10 मिनटां भितरूच मेळिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
