भांगरभूंय | प्रतिनिधी
३ लाख रुपया दंड; वैजकी व्हिसा आशिल्ल्यांक २९ एप्रील ही निमाणी तारीख
नवी दिल्ली, खबरां संस्था: केंद्र सरकारान पाकिस्तांनी नागरिकां खातीर एक नोटीस जारी केल्या. जर खंयचोय पाकिस्तानी दिल्ले मजतींत भारत सोडून वचूंक ना जाल्यार ताका अटक करतले आनी ताचे आड गुन्यांव दाखल करतले, अशें सांगलें. अशा नागरिकांक ३ वर्सांची बंदखण वा ३ लाख रुपयांचो दंड वा दोनूय ख्यास्ती जावपाक शकता.
४ एप्रील २०२५ सावन लागू जावपी ‘इमिग्रेशन अँड फॉरेनर्स ऍक्ट २०२५’ प्रमाण, व्हिसा अटी मोडल्यार वा दिल्ल्या काळा परस चड काळ भारतांत रावल्यार खर कारवाय करतले. सार्क व्हिसा धारकां खातीर भारत सोडपाची निमाणी तारीख २६ एप्रील आशिल्ली. वैजकी व्हिसा धारकां खातीर निमाणी तारीख २९ एप्रील आसा.
उण्या काळाच्या व्हिसा धारकां खातीरची निमाणी मुजत सोंपले उपरांत फाटल्या तीन दिसांनी अटारी शिमेवेल्यान वट्ट ५३७ पाकिस्तानी नागरीक परतले. अटारी शिमेचेर प्रोटोकॉल अधिकारी अरुण पाल हांणी, फाटल्या तीन दिसांनी ८५० भारतीय नागरीक परतल्या. आयताराच २३७ पाकिस्तानी तांच्या देशांत परतले, जाल्यार ११६ भारतीय नागरीक परत आयले.
भारताचे परराष्ट्र सचिव विक्रम मिस्री हांणी २३ एप्रिलाक सांगलें, पाकिस्तानी नागरिकांचे १४ श्रेणींतले व्हिसा रद्द करतात. १३ श्रेणींतल्या व्हिसा धारकांक २५ एप्रील मेरेन भारत सोडचें पडलें. मात ते २ दिसांनी वाडयले. ह्या१२ तरेच्या व्हिसा धारकांक आयतारा (२७ एप्रिल) खंयचेय परिस्थितींत भारत सोडचो पडलो.
सार्क व्हिसा: जायत्या व्हिसा प्रक्रियांची गरज पयस करपा खातीर १९९२ वर्सा सार्क व्हिसा सूट येवजण सुरू केली. हातूंत न्यायाधीश आनी खेळगड्यां सारके उच्चपदस्थ लोकांचो आसपाव आसा. हातूंत सामान्य नागरिकांचो आसपाव ना.
बिझनेस व्हिसा: वेवसाया खातीर भारतांत येवपी पाकिस्तानी नागरिकां खातीर.
व्हिजिटर व्हिसा: कुटूंब वा सोयर्यांक मेळपाक जारी करतात.
जर्नलिस्ट व्हिसा: वृत्तसंस्था, मिडिया आनी पत्रकारिते कडेन संबंदीत लोकां खातीर.
कॉन्फरन्स व्हिसा: सेमिनार वा कॉन्फरन्सींत वांटेकार जावपा खातीर.
ट्रान्झिट व्हिसा: भारत मार्गान तिसर्या देशांत प्रवास करपा खातीर.
ग्रुप टुरिस्ट व्हिसा: पाकिस्तानी पर्यटकांच्या गटांक भारत भेट दिवपा खातीर.
मावंटेनियरिंग व्हिसा: पर्वतारोहणा खातीर भारतांत येवपी परदेशी लोकां खातीर.
फिल्म व्हिसा: भारतांतले चित्रपट, टीव्ही शो खातीर.
स्टुडंट व्हिसा: हो परदेशी विद्यार्थ्यांक भारतांत शिक्षण घेवपाक दितात.
पिलग्रिम आनी ग्रुप पिलग्रिम व्हिसा: वैयक्तीक पाकिस्तानी नागरीक वा गटा खातीर भारतात तीर्थयात्रा करपा खातीर.
व्हिसा ऑन अरायव्हल: हो व्हिसा भारतांत आयले उपरांत उपलब्ध आसा. तशेंच, पाकिस्ताना खातीर आयले उपरांय व्हिसा प्रतिबंधीत आसा.
भारत सरकार पाकिस्तानी नागरिकांक उपचारां खातीर वैजकी व्हिसा दिता. दुयेतीं वांगडा चडांत चड २ सेवक वा कुटुंबांतल्या वांगड्यांक प्रवेश दिवपाक शकता. तांकां देश सोडपा खातीर २९ एप्रिल मेरेनचो वेळूय दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
