भारत सेमी फायनलींत

भांगरभूंय | प्रतिनिधी

भारतान बायलांच्या आशिया करंड टी-20 क्रिकेट सर्तीचे सेमी फायनलींत सुवात मेळयली. काल सिलहत आंतरराष्ट्रीय क्रिकेट स्टेडियमाचेर जाल्ले मॅचींत ताणें येजमान बांगलादेशाक 59 धांवड्यांनी हारयलो. भारतान पांचांतली चवथी मॅच जिखली. सेमी फायनलींतल्यो मॅची 13 ऑक्टोबरा सावन सुरू जातल्यो.

भारतान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 5 विकेटी वगडावन 159 धांवड्यो केल्यो. ताचो फाटलाव करतना बांगलादेशाक 20 ओव्हरींनी 7 विकेटी वगडावन फक्त 100 धांवड्यो करप शक्य जाल्यो.

ओपनर स्मृती मंधाना आनी शेफाली वर्मा हांणी भारताक बरी सुरवात करून दिली. पावर प्लेंत भारतान बिनबाद 59 धांवड्यो केल्यो. भारतान 5.2 ओव्हरींनी 50 धांवड्यो केल्यो. जाल्यार 10 ओव्हरी उपरांतचो स्कोर बिनबाद 91 असो आशिल्लो.

भारताक पयलो धपको 12वे ओव्हरीच्या निमाण्या बॉलाचेर बसलो. मंधाना धावंबाद जाली. तिणें 38 बॉलांनी 47 धांवड्यो केल्यो.

ते उपरांत शेफाली 14.5वे ओव्हरींत रुमानाच्या बॉलाचेर बोल्ड जाली. तिणें 44 बॉलांनी 55 धांवड्यो केल्यो. तिणें पांच चवके आनी स सके मारले. दोगांयनी पयले विकेटी खातीर 96 धांवड्यांची भागिदारी केली. जेमिमा रॉड्रिग्सान 24 बॉलांनी नाबाद 35 धांवड्यो केल्यो.

बांगलादेशा वतीन रमुना अहमदान तीन आनी सलमा खातुनान एक विकेट घेतली.

धांवड्यांचो फाटलाव करपी बांगलादेशाची सुरवात बरी जाली, पूण उपरांत डाव गडगडलो. ताणें पावर प्लेंत बिनबाद 30 धांवड्यो केल्यो. ओपनर फरगना हक आनी मुर्शिदा खातून हांणी पंगडाक बरी सुरवात करून दिल्ली. दोगांयनी पयले विकेटी खातीर 45 धांवड्यांची भागिदारी केली.

बांगलादेशाची पयली विकेट 10वे ओव्हरीच्या पयल्या बॉलाचेर पडली. स्नेह राणाच्या बॉलाचेर मुर्शिदान मंधानाक कॅच दिवन तंबूंत परतली. ती बाद जाल्या उपरांत फरगना हक लेगीत बाद जाली. तिका लेगीत स्नेह राणान बाद केली. फरगाना हक्क आनी निगार सुलताना हांचे खेरीत एकाय बॅट्समनाक व्हड खेळी करपाक जमली ना.

भारताच्या बॉलरां मुखार बांगलादेशाच्या बॅट्समनांक अपेस आयलें. शेफाली वर्मान अश्टतासांची खेळी करून भारताक व्हड जैत मेळोवन दिवपाक हातभार लायलो. शेफाली खेरीत दिप्ती शर्मान दोन विकेटी घेतल्यो. रेणुका सिंग आनी पुजा वस्त्रकर हांकां दरेकी एक विकेटी फावो जाली.