भांगरभूंय | प्रतिनिधी
भारतान बायलांची आशिया करंड टी-20 क्रिकेट सर्त जिखली. काल जाल्ले फायनलींत ताणें श्रीलंका पंगडाक 8 विकेटींनी हारयलो.
श्रीलंकेन टॉस जिखून पयलीं बॅटींग करपाचो निर्णय घेतलो. भारताच्या उत्कृश्ट बॉलिंगे मुखार श्रीलंकेक 20 ओव्हरींनी 9 विकेटी वगडावन फक्त 65 धांवड्यो करप शक्य जाल्यो. इनोका रनवेरान सगल्यांत चड 18 धांवड्यो केल्यो. भारता वतीन रेणुका सिंग ठाकूरान तीन विकेटी घेतल्यो. राजेश्वरी गायकवाड आनी स्नेह राणा हांणी दरेकी दोन विकेटी घेतल्यो.
भारतान 8.3 ओव्हरींनी फक्त 2 विकेटी वगडावन गरजेच्यो धांवड्यो केल्यो. स्मृती मंधानान सको मारून भारताक जैत मेळोवन दिलें. तिणें 25 बॉलांनी नाबाद 51 धांवड्यो केल्यो. हातूंत 6 चवके आनी 3 सक्यांचो आस्पाव आसा. मुखेली हरमनप्रीत कौर 11 धांवड्यो करून नाबाद रावली.
पयले विकेटी खातीर स्मृती मंधाना आनी शेफाली वर्मा हांणी 3.4 ओव्हरींनी 32 धांवड्यांची भागिदारी केली. शेफाली 8 धांवड्यो करून बाद जाली. जेमिमा रॉड्रिग्स फक्त दोन धांवड्यो करून बाद जाली.
आशिया करंड क्रिकेट सर्तीचे फायनलींत श्रीलंकेक हारोवपाची ही भारताची पांचवी खेप. दोनूय पंगड आतां मेरेन पांच खेपे फायनलींत एकामेका आड खेळ्ळ्यात आनी सगल्या फायनलींनी भारतान येस मेळयलां. भारत सेगीत आठवे खेपे फायनलींत पाविल्लो.
मजगतीं, श्रीलंका 50चो तरी आंकडो हुपतलो काय असो प्रस्न श्रीलंकेच्या क्रिकेट मोग्यांक पडिल्लो. पूण, इनोका रणवीरान 22 बॉलांनी 18 धांवड्यांची खेळी करून आपल्या पंगडाक 65 मेरेन पावयलो. तशेंच तिणें पंगडाक ऑलआवट जावपाक लेगीत दिवंक ना.
टॉस जिखून पयलीं बॅटींग करपाचो श्रीलंकेचो निर्णय चुकीचो थारलो. तिसरे ओव्हरींत मुखेली चमारी अट्टापट्टू (6) धांवबाद जाली. रिचा घोष आनी रेणुका सिंग हांणी उत्कृश्ट फिल्डींग केली.
ते उपरांत आयिल्ली हर्षिता समरविक्रमा (1), अनुष्का संजिवनी (0) आनी हसिनी परेरा (0) ह्यो रेणुका सिंगाचे एके ओव्हरींत सेगीत तीन बॉलांचेर बाद जाल्यो. अनुष्का धांवबाद जाली, ताका लागून रेणुकाची हॅट्रीकची संद फुकट गेली. सवे ओव्हरींत रेणुकान कविशा दिल्हारीक (6) बाद करून आपली तिसरी विकेट घेतली. श्रीलंकेचो अर्दो पंगड 15 धांवड्यां भितर तंबूंत गेल्लो.
राजश्वरी गायकवाडान निलक्षी डीसिल्वाक (6) बोल्ड करून श्रीलंकेक सवो धपको दिलो. स्नेह राणान सातवो धपको दितना मल्शा स्नेहानीची विकेट घेतली. अोशादी रणसिंघेन एक बाजू सांबाळून धरिल्ली. पूण, अखेरेक 13 धांवड्यांचेर गायकवाडाच्या बॉलाचेर बोल्ड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
