भांगरभूंय | प्रतिनिधी
संवसारीक टी-20 क्रिकेट सर्तींत आयज भारत सुपर 12तली आपली निमाणी झिम्बाब्वे आड खेळटलो. सेमी फायनलींत सुवात मेळोवपाचे दिश्टीन भारता खातीर ही मॅच जिखपाक जाय.
आदलो मुखेली विराट कोहली उत्कृश्ट फॉर्मांत आसा. पूण, रोहित शर्माक अजून मेरेन व्हड खेळी करपाक जमूंक ना. लोकेश राहुल आनी सुर्यकुमार यादव सारक्या खेळगड्यांनी कांय जबरदस्त बॅटींग केल्या. पूण, रोहित शर्माचें अजून बॅट लागूंक ना.
अजून मेरेन चार मॅचींतल्यान ताणें फक्त 74 धांवड्यो केल्यात. मॅलबॉर्न क्रिकेट मैदानाचेर खेळटना भारतान पाकिस्ताना आड म्हत्वाचें जैत जोडिल्लें. कोहलीन ते मॅचींत दोळे दिपकावपी बॅटींग केल्ली. पूण आयज झिम्बाब्वे आडची मॅच लेगीत तितकीच म्हत्वाची आसा. आयचे मॅची वरवीं भारत निमाण्या चारांनी पावतलो काय ना हें स्पश्ट जातलें.
झिम्बाब्वेन सर्तीक बरे तरेन सुरवात केल्ली. पूण उपरांत ताका आपलो फॉर्म कायम राखपाक जमूंक नाशिल्लो. झिम्बाब्वेच्या बॅट्समनांक अजून मेरेन बरें प्रदर्शन करपाक जमूंक ना. भारता मुखार लेगीत तांकां धांवड्यो करप तितक्यो शक्य ना. भुवनेश्वर कुमार, अर्शदीप सिंग आनी मोहम्मद शमी हे तिनूय बॉलर फॉर्मांत आसात.
आयची मॅच जिखली जाल्यार बारत ग्रुप दोनांत पयले सुवातेर पावतलो. हारलो जाल्यार पाकिस्तानाक सेमी फायनलींत सुवात मेळोवपाचो मार्ग उक्तो जातलो. पाकिस्तान आपले निमाणे मॅचींत बांगलादेशाक हारयता जाल्यार तो बरे रनरेटीच्या नेटार सेमी फायनलींत पावतलो. ग्रुप दोनांतलो आनीक पंगड दक्षीण आफ्रिका पांच गुणां सयत दुसरे सुवातेर आसा. तो आयज नॅदरलॅण्डा आड खेळटलो. जर तो नॅदरलॅण्डा आड हारलो आनी पाकिस्तान पंगड बांगलादेशा आड जिखलो तर पाकिस्तान आनी भारत सेमी फायनलींत पावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
