भांगरभूंय | प्रतिनिधी
बायलांचे आशिया करंड टी-20 सर्तीची फायनल भारत आनी श्रीलंका ह्या पंगडां मदीं जातली. पयले सेमी फायनलींत भारतान थायलॅण्डाक 74 धांवड्यांनी हारोवन सहज रितीन फायनलींतली सुवात निश्चीत केली. भारताचो पंगड आठवे खेपे फायनलींत खेळटलो. हाचे पयलीं सातांतल्यो स फायनलीं भारतान जिखल्यात.
मजगतीं, उमळशीक वाडोवपी दुसरे सेमी फायनलींत श्रीलंकेन पाकिस्ताना आड फक्त एके धांवडेन जैत जोडलें. फायनल शेनवारा जातली.
थायलॅण्डान टॉस जिखून पयलीं भारताक बॅटींग करपाचें आमंत्रण दिलें. भारतान निर्धारीत 20 ओव्हरींनी 6 विकेटी वगडावन 148 धांवड्यो केल्यो. मोख तशी व्हड नाशिल्ली. पूण, अणभव नाशिल्ल्या थायलॅण्डाचो डाव गडगडलो आनी ताका 9 विकेटी वगडावन फक्त 74 धांवड्यो करप शक्य जाल्यो. शेफाली वर्मा प्लेयर ऑफ द मॅच थारली.
भारताक शेफाली वर्मान बरी सुरवात करून दिली. तिणें स्मृती मंधाना वांगडा मेळून पयले विकेटी खातीर 38 धांवड्यांची भागिदारी केली. मधाना 4.2वे ओव्हरींत 13 धांवड्यो करून बाद जाली. जाल्यार भारतान पावर प्लेंत 1 विकेट वगडावन 47 धांवड्यो केल्यो. शेफालीन जलद रितीन धांवड्यो केल्यो. तिणें 28 बॉलांनी 42 धांवड्यो केल्यो. हातूंत एक सक्याचो आनी पांच चवक्यांचो आस्पाव आसा. अखेरेक ती टिपोचान बाद केली. मुखेली हरमनप्रीत कौरान 30 बॉलांनी 36 धांवड्यो केल्यो.
थायलॅण्डा वतीन नताया बुचाथमान चार ओव्हरींनी 31 धांवड्यो दिवन 1 विकेट घेतली. फनिया मायान 1 ओव्हरींत 12 धांवड्यो दीत 1 विकेट मेळयली.
मोखीचो फाटलाव करपाक मैदानांत देंवपी थायलॅण्डाची सुरवात सामकी बाबत जाली. 26 धांवड्यांचेर ताणें 4 विकेटी वग़डायिल्ल्यो. सात धांवड्यांचेर ओपनर नानपट कोंचारोएनकी दिप्ती शर्माच्या बॉलाचेर बाद जाली. दुसरी ओपनर नाथकन चेंथम लेगीत फक्त 7 धांवड्यो करून तंबूंत परतली.
भारता वतीन दिप्ती शर्मान 4 ओव्हरींनी सात धांवड्यो दिवन 3 विकेटी घेतल्यो. राजेश्वरी गायकवाडान 10 धांवड्यो दिवन थायलॅण्डाच्या दोन बॅट्समनांक तंबूंत धाडले.
श्रीलंकेक एके धांवडेन जैत
दुसरे सेमी फायनलींत श्रीलंकेन पाकिस्तानाक एके धांवडेन हारयलो. श्रीलंकेन टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 6 विकेटी वगडावन 122 धांवड्यो केल्यो.
मोखीचो फाटलाव करपी पाकिस्तानान सादूरतायेन खेळ केलो. पाकिस्तान ही मॅच सहज जिखतलो अशें दिशिल्लें. पूण, श्रीलंकेन जबरदस्त प्रदर्शन करून निसट्टें जैत जोडून फायनलींतली सुवात निश्चीत केली.
अखेरच्या बॉला मेरेन मॅच रंगली. निमाण्या तीन ओव्हरींनी मॅच श्रीलंके वटेन घुंवपाक सुरवात जाली. निमाण्या तीन ओव्हरींनी पाकिस्तानाच्यो तीन विकेटी पडल्यो. मुखेली बिस्माह मारुफान 42 धांवड्यांची खेळी केली. पूण, तिका आपल्या पंगडाक जैत मेळोवन दिवपाक जमलें ना. अखेरचे ओव्हरींत पाकिस्तानाक 9 धांवड्यांची गरज आशिल्ली. जाल्यार निमाण्या बॉलाचेर तीन धांवड्यांची गरज आशिल्ली. पूण, पाकिस्तानाक निमाण्या बॉलाचेर फक्त एक धांवडी करप शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
