भारत-मध्य पूर्व-युरोप अर्थीक कॉरिडॉरची घोशणा

भांगरभूंय | प्रतिनिधी

-सबका साथ, सबका विकास मोदींचो मार्गदर्शक मंत्र

जी 20 परिशदेंत भारत, संयुक्त राज्य अमेरिका, सौदी अरेबिया आनी युरोपीय संघा सयत 9 देशांक जोडपी नव्या अर्थीक कॉरिडॉरची घोशणा केल्या. प्रधानमंत्री मोदी हांणी हे विशीं म्हायती दिली. भारत‍-मध्य पूर्व युरोप जोडपी नवो मार्ग बेगिनूच सुरू जातलो. 
सध्या दिल्लींत सुरू अाशिल्ल्या जी 20 परिशदेंत हे विशीं म्हत्वाची कबलात जाल्या. भारत – मध्य पूर्व युरोप अर्थीक कॉरिडार रेल्वे मार्गान जोडटले. भारत-मध्य पूर्व- युरोप अर्थीक कॉरिडॉर, शिपींग आनी रेल्वे लिंक सयत बेगिनूच जोडटले. युरोप, युएई आनी मुंबय असो रेल्वेचो प्रवास आसतलो. भारताची अर्थीक राजधानी मुंबय खातीर हो म्हत्वाचो निर्णय थारतलो. ताका लागून हेर देशांची भारतांत खासा करून मुंबयंत गुंतवणूक वाडोवपाक जायत्यो संदीय मेळटल्यो.
घटमूट कनेक्टिव्हिटी आनी मुळाव्यो सुविधा
भौतीक मुळाव्या सुविधां वांगडाच सामाजीक, डिजिटल आनी अर्थीक मुळाव्या सुविधांनी व्हड प्रमाणांत गुंतवणूक जातली. हे वरवीं आमी विकसीत भारताचो घटमूट बुन्याद घालतले. दक्षीे कडल्या जायत्या देशांनी विस्वासू भागिदार म्हूण भारतान ऊर्जा, रेल्वे आनी उदक हे सारक्या क्षेत्रांत मुळाव्यो सुविधा प्रकल्प राबयल्यात. ह्या यत्नांत भारतान मागणीचेर आदारीत आनी पारदर्शक दिश्टीकोणाचेर विशेश भर दिला.

नवी दिल्लीः देशांत जी 20 शिखर परिशद सुरू आसा. भारताचे अध्यक्षते खाला पयलेच खेपे ह्या संमेलनाचे आयोजन राजधानी दिल्लींत केलां. अमेरिकेचे राष्ट्राध्यक्ष ज्यो बायडेन, ब्रिटनाचे प्रधानमंत्री ऋषी सुनक हांचे सयत जायत्या देशांचे फुडारी नवी दिल्लींत दाखल जाल्यात.

प्रधानमंत्री नरेंद मोदी हांणी जी-20 परिशदेच्या सुरवातीक सगल्या देशांच्या फुडाऱ्यांक येवकार दिलो. तशेंच जी-20 परिशदे कडेन कोट्यांनी भारतीय जोडल्यात, अशें नमूद केले. विशेश म्हणल्यार प्रधानमंत्री नरेंद्र मोदी हांणी देशाची वळख ‘इंडिया’ अशी क​रिनासतना ‘भारत’ अशी करून दिली. भारत नांवाची पाटी प्रधानमंत्री नरेंद्र मोदी हांच्या आसना मुखार लायिल्ली.

21 वो शेंकड्यांतलो हो कोळ जगाक नवी दिशा दाखोवपी आनी नवी दिशा दिवपी म्हत्वाचो काळ. ह्या काळांत जायत्या वर्सांपसुनचीं आव्हानां आमचे मुखार उबीं आसात. आनी हे समस्येंतल्यान उपाय काडपाक आमचे कडेन सगले आस्तेन पळयतात. ते खातीर मनीसकेंद्रींत दिश्टीकोण दवरून दरेकल्याक जापसालदारकेन मुखार वचपाचे आसा. ते खातीर ‘सबका साथ, सबका विकास, सबका विस्वास, सबका प्रयास’ हो मंत्र सगल्यां खातीर एक मार्गदर्शक थारपाक शकता, असो विस्वास प्रधानमंत्री मोदी हांणी उक्तायलो.

भारताचे जी 20 परिशदेचें अध्यक्षपद देशांतर्गत आनी देशाच्या भायर समावेशकता आनी सगल्यांक वांगडा घेवपाचें प्रतीक जालां. देशांतल्या 60 शारांनी 200 परस चड बसका जाल्यो. कोट्यांनी भारतीय हे परिशदे वांगडा जोडल्यात, अशें मोदी हांणी नमूद केले.

जागतीक अर्थवेवस्थेंतलो चडउतार आसूं, उत्तर आनी दक्षीणेंतली विभागणी आसूं, पूर्व आनी पश्चिम अर्थवेवस्थेंतलो फरक आसूं, अन्न, इंधन हांचे वेवस्थापन आसूं, आतंकवाद आनी सायबर सुरक्षा आसूं, भलायकी, उर्जा आनी उदका सुरक्षा आसूं, वर्तमाना सयत फुडारांतल्या पिळग्यां खातीर आमकां ह्या आव्हानांचेर उपाय येवजण आंखपा कडेन वाटचाल करची पडटली, अशेंय मोदी हांणी म्हणलें.

———

मनीसजातीचें कल्याण आनी सूख सुनिश्चीत करुंया

जी 20 शिखर परिशदेच्या सुवाते पसून कांय अंतराचेर एक स्तंभ उबारला. ताचेर ‘मनीसजातीचें कल्याण आनी सूख सदांच सुनिश्चित करपाक जाय’ असो संदेश दिला. अडेज हजार वर्सां पयलीं भारताचे भूंयेन हो संदेश जगाक दिल्लो. ह्या संदेशा विशीं जी-20 शिखर परिशदेक सुरवात करुंया, असो उलो प्रधानमंत्री मोदी हांणी केलो.

आस्त आनी विस्वासाचें नवें नांव ‘भारत’

जी 20 परिशदेंत प्रधानमंत्री मोदी मुखार लायिल्ले नेमप्लेटीचेर ‘भारत’ नांवांचो उल्लेख आसा. भारताची राजधानी आशिल्ल्या नवी दिल्लींत 9, 10 अशें दोन दिसांचे जी 20 परिशदेचें आयोजन केलां. प्रधानमंत्री नरेंद्र मोदी हांणी हे परिशदेची सुरवात केली. भारत मंडपम प्रगती मैदान ही परिशद सुरू आसा.

आफ्रिकन युनियनच्या वांगडीपदाची घोशणा

जी 20 परिशदेंत नरेंद्र मोदी हांणी आफ्रिकन युनियनच्या वांगडीपदाची घोशणा केली. तशेंच ह्या वांगडीपदाचेर सगल्यांची सहमती आशिल्ल्याचेंय तांणी सांगलें. म्हत्वाचें म्हणल्यार, आफ्रिकन युनियनांत वट्ट 55 देशांचो आस्पाव आसा. आफ्रिकन युनियनच्या आस्पावा उपरांत, जी 20 आतां जी 21 लेगीत जावपाक शकता. दक्षीण आफ्रिकेच्या आस्पावा उपरांत, जी 20 युरोपियन युनियना उपरांत, आतां देशांचो सगल्यांत व्हड समूह जाला.

‘सबका साथ, सबका विकास, सबका विस्वास आनी सबका प्रयास’ हो मंत्र सगल्यां खातीर मार्गदर्शक थारपाक शकता. जी 20 च्या अध्यक्षाच्या रुपांत भारत पुराय जगाक, जागतीक विस्वासाचें रुपांतर विस्वासांत करपाचें आवाहन करता. हो सगल्या खातीर वांगडा वाटचाल करपाचो वेळ आसा. आमी कोरोना सारक्या म्हामारीचेर मात करपाक शकतात, जाल्यार विस्वासाच्या उणीवेचेरूय मात करपाक शकतात, हे मतींत दवरपाक जाय, अशें मोदी हांणी म्हणलें.

15 द्विपक्षीय बसकांचेर नदर

– जी 20 परिशदेच्या निमतान प्रधानमंत्री मोदी तीन दिसांत 15 द्विपक्षीय चर्चा करतले.

– अमेरिका, सौदी अरेबिया वांगडाच्या बसके कडेन सगल्यांची नदर.

– अमेरिके वांगडा जेट इंजिनाची भारतांत निर्मणी करपा विशीं आनी मिलिट्री ड्रोन खरेदी संदर्भांत कांय म्हत्वाच्यो कबलाती जावपाची शक्यताय.

-भारत-अमेरिका-सौदी अरेबिया हांचे मदीं युरोप मिडल इस्ट आनी भारत रेल्वे आनी बंदर मार्गान जोडपा विशीं कांय म्हत्वाच्यो घोशणा जावये.