भांगरभूंय | प्रतिनिधी
भारत संवसारीक टी-20 क्रिकेट सर्तीची सुरवात आयज पाकिस्ताना आड खेळून करतलो. दोनूय पंगड जैतान सुरवात करपाक इत्सूक आसतले. संवसारीक टी-20 क्रिकेट सर्तींत दोनूय पंगड एकामेका आड वट्ट स मॅची खेळ्ळ्यात. पांच खेपे भारतान जैत जोडलां, जाल्यार एकदा पाकिस्तान जैत जोडपाक येसस्वी थारला. पोरूं युएईंत जाल्ले संवसारीक टी-20 सर्तींत विराट कोहलीच्या फुडारपणाखाला खेळपी भारताक पाकिस्ताना आड हार घेवची पडिल्ली. आतां ते हारीचो बदलो घेवपाक रोहित शर्माच्या फुडारपणाखाला खेळपी भारतीय पंगड सज्ज आसा.
पाकिस्तानाचो बॉलींग विभाग घटमूट आसा. शाहीन आफ्रिदी खेरीत नसीम शाह आनी हॅरीस राउफ हे प्रतिभावंत बॉलर पाकिस्तानाच्या पंगडांत आसात. भारताचे सुरवातीचे बॅट्समन आफ्रिदीक पावर प्लेंत कशे तरेन खेळटले हाचेर मॅचीचो फुडार निंबून आसतलो. टी-20 प्रकारांतलो भारताचो पयल्या क्रमांकाचो बॅट्समन सुर्यकुमार यादवाचेर चडश्यो गजाली निंबून आसतल्यो. परिस्थिती कितेंय आसूंय तो आपलो सैमीक खेळ करपाक प्रसिद्ध आसा.
पावस पडलो जाल्यार रोहित शर्मा टॉस जिखून पयलीं फिल्डींग करपाचो निर्णय घेवपाक शकता. भारता कडेन तीन तज्ञ स्पिनर आसात.पूण, हवामाना प्रमाण तांकां खेळपाचो निर्णय पंगड वेवस्थापन घेतलो.
आयसीसीचे सर्तींत भारतान सदांच पाकिस्तानाचेर आपलो शेक दवरला आसलो तरी आयचे मॅचींत पाकिस्तानाचें मात्शें दालें जड दिसता. हाचें एकोडें कारण म्हणल्यार शाहिन आफ्रिदी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
