भांगरभूंय | प्रतिनिधी
खबरां संस्था
दुबयः आयतारा जाल्ले आशिया कप क्रिकेट सर्तीतले सुपर 4 फेरयेतले मॅचींत भारताक पाकिस्ताना कडल्यान 5 विकेटींनी हार खावची पडली. फास्ट बॉलर अर्शदीप सिंगान कसवटेच्या वेळार एक कॅच सोडिल्ल्यान सोशल मीडियाचेर ताचेर खर टिका चल्ल्या. कांय नेटिझनांनी ताका खलिस्तानी थारावन ताका पंगडांतल्यान भायर काडपाची मागणी केल्या.
भारतीय खेळगड्यांनी ही म्हत्वाची मॅच जिखपाचे जीव तोडून यत्न केलें. मात अर्शदिपान सोडल्ले एक कॅचीक लागून भारताक हार खावची पडली अशी कांय क्रिकेट मोगींची भावना जाल्या. ताका खलिस्तानी थारावपी कांय पोस्ट सोशल मीडियाचेर पोस्ट केल्यात. अर्शदिपान सोडिल्ले कॅचीचो मुद्दो घेवन ताका खलिस्तानी थारावन पंगडांत ताका सुवात दिवची न्हय अशी मागणी जावपाक लागल्या.
भारताचे हारीक लागून अर्शदिपाचेर टिका जाता तरीय कांय लोकांनी ताची फाटराखण केल्या. खेळांत अश्यो गजाली घडत आसतात. अर्शदीप खरो देशभक्त आसा. ताचेर अशे आरोप करप समा न्हय अशें कांय जाण म्हणटात. भारताचो स्टार बॅट्समन विराट कोहलीन लेगीत अर्शदिपाची फाटराखण केल्या. जेन्ना चेंपणा खाला खेळटात तेन्ना अश्यो चुको जातात. तातूंतल्यान धडो घेवन परत एक फावट तशे परिस्थितीक तोंड दिवपाक आमी तयार आसपाक जाय अशें विराटान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
