भारत पयले खेपे फायनलींत

भांगरभूंय | प्रतिनिधी

भारताच्या दादल्यांच्या बॅडमिंटन पंगडान उमळशीक वाडोवपी सेमी फायनलींत दक्षीण कोरिया पंगडाक 3-2 फरकान हारोवन आशियायी खेळाच्या इतिहासांत पयले खेपे सांघीक सर्तीचे फायनलींत सुवात मेळयली. भारताचो अणभव किदाम्बी श्रीकांतान चुरशीचे मॅचींत जैत मेळोवन भारताची फायनलींतली सुवात निश्चीत केली. भांगरा पदका खातीर भारत आतां चीना आड खेळटलो. ह्या जैतान भारताचें किमान रुप्या पदक निश्चीत जालां.

भारताच्या दादल्यां बॅडमिंटन पंगडान 1986 सिओलांत सैय्यद मोदीच्या फुडारपणाखाला कांश्या पदक जिखिल्लें. जाल्यार 1982 आनी 1974त लेगीत भारतान कांश्या पदक जिखिल्लें.

पयले मॅचींत संवसारीक वस्तादपण सर्तींत कांश्या पदक जिखपी एच एस प्रणयान कोरियाच्या जिओन ह्योक जिनाक 18-21, 21-16 आनी 21-19 अशा तीन गेमींनी हारोवन भारताक 1-0 अशी आघाडी मेळोवन दिली. ते उपरांत भारताची स्टार जोडी सात्विक साईराज रंकीरेड्डी आनी चिराग शेट्टी हांकां निर्शेणी हाताक लागली. तांकां सध्याची संवसारीक वस्ताद जोडी सियो सेउंग जे आनी कांग मिन ह्युक हांचे कडल्यान 13-21, 24-26 अशा फरकान हार घेवची पडली. ताका लागून स्कोर 1-1 असो जालो.

ते उपरांत युवा खेळगडो लक्ष्य सेनान युंग्यू लीक 21-7 आनी 21-9 असो हारोवन भारताक 2-1 अशी आघाडी मेळोवन दिली. ते उपरांत अर्जुन मदाथिल रामचंद्रन आनी ध्रुव कपिला हे जोडयेक 16-21 आनी 11-21 हार घेवची पडली. ताका लागून स्कोर परतून 2-2 असो बरोबरींत आयलो. निमाणे मॅचींत किदाम्बा श्रीकांतान 12-21, 21-16 आनी 21-14 अशा तीन गेमींनी जैत जोडून भारताक म्हत्वाचें जैत मेळोवन दिलें.

भारत आयज जावपी फायनलींत चीना आड खेळटलो. चीनान पयले सेमी फायनलींत जपानाक 3-1 असो हारयलो.

भारतान अजून मेरेन बॅडमिंटनांत 10 पदकां जिखल्यात. वैयक्तीक गटांत तीन, दादल्यांच्या पंगडान तीन, बायलांच्या पंगडान दोन आनी दादल्यांच्या दोट्टी पंगडान आनी मिश्र पंगडान एकेक पदक जिखलां.