भांगरभूंय | प्रतिनिधी
बायलांची आशिया करंड टी-20 क्रिकेट सर्तीची फायनल मॅच आयज भारत आनी श्रीलंका ह्या पंगडां मदीं जातली.
पयले सेमी फायनलींत भारतान थायलॅण्डाक 74 धांवड्यांनी हारयिल्लो, जाल्यार दुसरे सेमी फायनलींत श्रीलंकेन पाकिस्तानाचें आव्हान फक्त एके धांवडेन सोंपयिल्लें. भारतान आशिया करंड क्रिकेट सर्तीचेर आपलो शेक दवरला. ताणें स खेपे सर्तीचें वस्तादपण जोडलां आनी हो शेक कायम दवरतना सातवे खेपे करंडाचेर नांव कोतरावपाक इत्सूक आसतलो.
भारताच्या युवा खेळगड्यांनी आतां मेरेन जबरदस्त प्रदर्शन केलां. मुखेली हरमनप्रीत कौर आनी उप मुखेली स्मृती मंधाना हांच्या व्हड योगदाना बगर भारतान फायनलींत सुवात मेळयल्या. नव्या खेळगड्यांची प्रतिभा सोदून काडपाक ही सर्त फायदेशीर थारल्या.
अणभवी हरमनप्रीत कौर फक्त चार मॅची खेळ्ळा. आनी ह्या चार मॅचींतल्यान ताणें फक्त 81 धांवड्यो केल्यात. तशेंच तिणें त्या मॅचींनी खेळटना फक्त 72 बॉलांक तोंड दिलां.
मंधाना लेगीत फक्त तीन मॅचींनी खेळ्ळा. एक मॅचींत तिणें वांटो घेवंक नाशिल्लो. पंगडाक तिची गरजूच पडूंक ना. युवा खेळगड्यांनी योग्य रितीन चेपण हाताळ्ळां.
18 वर्सां पिरायेची शेफाली वर्मा, 22 वर्सां पिरायेची जेमिमा रॉड्रिग्स आनी 25 वर्सां पिरायेची दिप्त शर्मा हांणी जबरदस्त प्रदर्शन केलां. तांणी येसस्वी रितीन चेपण हाताळतना पंगडाक फायनली मेरेन पावयलो. शेफालीन 161 धांवड्यो दितना तीन विकेटी घेतल्यात. जेमिमान 215 धांवड्यो केल्यात, जाल्यार दिप्तीन 94 धांवड्यो दिवन 13 विकेटी आपल्या नांवार केल्यात.
सर्तींत फक्त पाकिस्ताना आड भारत हारला. हे हारीक मुख्य प्रशिक्षक रमेश पोवार आनी मुखेली हरमनप्रीत कौर जापसालदार आसा. ते मॅची खातीर पंगडान योग्य रणनिती आखूंक नाशिल्ली.
लीग पांवड्याचेर भारत आनी श्रीलंका एकामेका आड खेळिल्ले. ती मॅच भारतान 41 धांवड्यांनी जिखिल्ली. पूण, पाकिस्ताना आडची उमळशीक वाडोवपी सेमी फायनल जिखल्या उपरांत श्रीलंकेचो आत्मविस्वास निश्चीत रितीन वाडला आसतलो. ताका लागून श्रीलंकेक उणो लेखप भारताक म्हारग पडपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
