भांगरभूंय | प्रतिनिधी
हांगाच्या एम चिन्नास्वामी स्टेडियमाचेर न्युझिलॅण्ड अ पंगडा आड सुरू जाल्ले तिसरे अनधिकृत टॅस्टीच्या पयल्या दिसा येजमान भारत अ पंगडान ऋतुराज गायकवाडाच्या शेंकड्या नेटार 293 धांवड्यो केल्यो. तिसरे सुवातेर बॅटिंगेक आयिल्ल्या गायकवाडान जबरदस्त बॅटींग करून न्युझिलॅण्ड अ पंगडाच्या बॉलरांचो कस लायलो. ताणें 127 बॉलांनी 12 चवके आनी दोन सक्यांचे मजतीन 108 धांवड्यो केल्यो. ऋतुराजाक विकेटकीपर बॅट्समन उपेंद्र यादवान उत्कृश्ट साथ दिली. ताणें 76 धांवड्यांचें योगदान दिलें.
ते पयलीं भारत अ पंगडान सादूरतायेन सुरवात केली. मुखेली प्रियांक पंचालान खेळपट्टीचेर तग धरपाचो यत्न केलो. पूण, 20वे ओव्हरींत तो मॅथ्यू फिशराचो शिकार थारलो. प्रियांकाक 54 बॉलांनी फक्त 5 धांवड्यो करप शक्य जाल्यो. जाल्यार अभिमन्यु ईश्वरान 83 बॉलांनी दोन चवके आनी एक सक्याचे मजतीन 38 धांवड्यो केल्यो. रजत पाटीदारान 52 बॉलांनी 30 धांवड्यो केल्यो. बीसीसीआयच्या निवड समितीच्या वांगड्यांची नदर सरफराज खानाचेर आशिल्ली. पूण, तो शुन्याचेर बाद जालो.
भारत अ वतीन ऋतुराज आनी उपेंद्र यादव हांणी डाव मुखार व्हेलो. ज्या वेळार 4 बाद 111 असो स्कोर आशिल्लो, त्या वेळार दोगांयनी खेळपट्टीचेर जम बरयलो आनी धांवड्यो केल्यो. उपेंद्रान 134 बॉलांनी 9 चवके आनी दोन सक्यांचे मजतीन 76 धांवड्यो केल्यो. ऋतुराजान शेंकडो मारून भारताच्या टॅस्ट पंगडांतली आपली दावेदारी सादर केली.
न्युझिलॅण्ड अ पंगडा वतीन मॅथ्यू फिशरान 52 धांवड्यो दिवन 4 विकेटी घेतल्यो. जाल्यार जॅकब डफीन 56 धांवड्यो दिवन दोन विकेटी मेळयल्यो. सीन सोलिया, रचिन रविंद्राृ हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
