भांगरभूंय | प्रतिनिधी
मुख्यमंत्री, राज्यपाल आनी पुलीस महासंचालका कडेन केली चर्चा
वास्को, प्रतिनिधी: भारतीय तटरक्षक दळाचे अतिरिक्त महासंचालक के आर सुरेश हांणी आपले गोंय भेटी वेळार मुख्यमंत्री डॉ. प्रमोद सावंत, राज्यपाल पी. एस. श्रीधरन् पिल्लई तशेंच पुलीस महासंचालक जसपाल सिंग हांची भेट घेतली.
ह्या वेळार तांणी दर्या सुरक्षितताय, सोद आनी राखण कामांत एकामेकांचें सहकार्य वाडोवप, भारतीय तटरक्षक आनी गोंय राज्या मदलो समन्वय वाडोवप हे संबंदी चर्चा केली. तशेंच प्रशिक्षण कार्यावळ, जोड सराव, इंटेलिंजन्स शेअररिंग तशेंच हेर विशयांचेर चर्चा केली.
सुरेश हांणी भारतीय तटरक्षक दळ आनी थळावे अधिकारी हांचे मदल्या सहकार्या विशीं खोस उक्तायली. गोंयच्या दर्या वाठाराची राखण आनी सुरक्षितताय सुनिश्चीत करपा खातीर सामुहीक यत्नांक चडांत चड म्हत्व दितले अशें तांणी सांगलें. हे भेटीक लागून भारताच्या दर्यादेग वाठारांची राखण करपा खातीर भारतीय तटरक्षक दळ आनी गोंय राज्याची लागणूक आनीक घट जाल्ल्याचें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
