भांगरभूंय | प्रतिनिधी
नवी दिल्ली, खबरां संस्था: भारतीय कुस्ती महासंघाच्या अध्यक्षपदार संजय सिंह हांची निवड जाल्ली. हे वेंचणुके उपरांत स्थापन जाल्ली कमिटी केंद्र सरकारान निलंबीत केल्या. तशेंच, संजय सिंह हांकांय निलंबीत केल्या.
संजय सिंह हांची अध्यक्षपदार निवड जातांच नंदिनी नगर, गोंडा हांगा अंडर १५ आनी अंडर २० खेळगड्यांची सर्त घोशीत केल्ली. हाचे वयल्यान कुस्तीपटू साक्षी मलिक हांणीय जाहीर टिका केल्ली. उपरांत, केंद्रीय खेळां मंत्रालयान संजय सिंग हांचे अध्यक्षतेखाला आशिल्ली कमिटी निलंबीत केली.
राष्ट्रीय सर्त घोशीत करतना घाई केल्या. तशेंच सर्त जाहीर करतना योग्य प्रक्रिया पाळूंक ना, अशें खेळां मंत्रालयान म्हणलां. नव्या मंडळाचे अध्यक्ष संजय कुमार सिंह हांणी २१ डिसेंबराक जाहीर केलें, कनिश्ठ राष्ट्रीय सर्त हें वर्स सोंपचे पयलीं सुरू जातली. ही प्रक्रिया नेमां आड आसा. सर्त जाहीर करतना खेळगड्यांक पंदरा दिसांचो वेळ दिवप गरजेचें, अशें खेळां मंत्रालयान म्हणलां. अशेे निर्णय (होल्डिंग नॅशनल) कार्यकारी समितीन घेवपाक जाय. ताचे पयलीं अजेंडाचेर विचार करप गरजेचें.
‘मिटिंगे खातीर सुचवण्यो आनी कोरम’ ह्या माथाळ्या खाला WFI घटनेच्या कलम XI प्रमाण, कार्यकारी समितीचे बसके खातीर १५ दिसां आदी सुचवणी दिवप आनी समितींत एक तृतीयांश प्रतिनिधी आसप गरजेचें. जाल्यार आपत्कालीन परिस्थिती खात्याक सात दिसां पयलीं सुचवणी दिवप गरजेचें, अशें मंत्रालयाने नमूद केलां.
नवें मंडळ आदल्या पदाधिकार्यांच्या नियंत्रणांत
मंत्रालयान म्हणलां, नवें मंडळ आदल्या पदाधिकार्यांच्या पुरायेन नियंत्रणांत आसा.तशेंच खेळां संहितेकडेन पुरायेन आडनदर जाता. फेडरेशनाचो कारभार आदल्या पदाधिकार्यांच्या नियंत्रणा खाला आशिल्ल्या जाग्या वयल्यान चलयता. ज्या जाग्यार खेळाडूंचो लैंगीक छळ केल्ल्याचो आरोपूय केला आनी न्यायालयांत ह्या प्रकरणाची सुनावणी सुरू आसा, अशें तातूंत फुडें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
