भांगरभूंय | प्रतिनिधी
भारत आनी जर्मनी ह्या पंगडां मदीं आयज दादल्यांची संवसारीक ज्युनियर हॉकी सर्तीची सेमी फायनल जातली. आत्मविस्वासान खेळपी भारत जैत जोडून चवथे खेपे फायनलींत सुवात मेळोवपाच्या यत्नांत आसतलो.
संवसारीक रॅंकिंगेंत तिसरे सुवातेर आशिल्ल्या भारताच्या पंगडान क्वॉर्टरफायनलींत रॅंकिंगेंत चवथे सुवातेर आशिल्ल्या नॅदरलॅण्डाच्या पंगडाक क्वॉर्टरफायनलींत 4-3 फरकान हारयिल्लो. मध्यांतरा मेरेन दोन गोलांनी फाटीं आशिल्ल्या भारतान उपरांत जबरदस्त खेळ करून मॅच आपले वटेन घुंवडायली. मॅच सोंपपाक तीन मिनटां बाकी आसतना मुखेली उत्तम सिंगान गोल करून भारताक जैत मेळोवन दिल्लें.
चेपणाखाला खेळपाची आमकां संवय जाल्या. आशिया करंड सर्तींत पाकिस्ताना आडची फायनल आसूं वा जोहोर करंड सर्तींत कांश्या पदका खातीर जाल्ली मॅच. आमी चेपणाखाला सदांच बरो खेळ केला अशें भारताचो मुखेली उत्तम सिंगान म्हणलें.
भारताचो आत्मविस्वास वाडपा फाटलें मुखेल कारण म्हणल्यार सुरवातीक गोल घेवन लेगीत मॅचींत येसस्वी रितीन पुनरागमन केलां. नॅदरलॅण्डा आडचे मॅचींत बॅकफुटार आसून लेगीत उपरांत आक्रमक केळ करून जैत जोडिल्लें. पूण, जर्मनी आड पंगडाक सादूर रावपाची गरज आसा. जर्मनीची बचाव फळी खूब घटमूट आसा. तशेंच जलद रितीन प्रतिहल्लो करपाक फिशाल आसा. नॅदरलॅण्डा आड रोहितान अखेरच्या क्वॉर्टरांत स पॅनल्टी कॉर्नर आडावन भारताक जैत मेळोवन दिवपाक म्हत्वाचें योगदान दिल्लें. भारताक आयची मॅच जिखपाक जाय जाल्यार प्रतिस्पर्धी पंगडाक चड पॅनल्टी कॉर्नर दिवपाची आपली संवय बंद करची पडटली. ही संवय जर्मनी आड म्हारग पडुये.
अंदूं भारताचो पंगड जर्मनी आड चार खेपे खेळ्ळा आनी चारूय खेपे भारताक हार घेवची पडल्या. निमाणे खेपे जोहोर करंड सर्तीचे सेमी फायनलींत हारिल्लो. जर्मनीन ते मॅचींत भारताक 6-3 अशा व्हडा फरकान हारयिल्लो.
जर्मनी पंगडाक हारोवप शक्य आसा. जोहोर करंड सर्तींत आमकां जर्मनी आड व्हडा फरकान हार घेवची पडिल्ली. पूण, त्या वेळा वयलो आनी सध्याचो भारताचो पंगड हातूंत खूब फरक आसा अशें भारताचो प्रशिक्षक सी आर कुमारान सांगलें.
संवसारीक सर्तींतल्या सगल्या पंगडांचें विश्लेशण केलां. आमी आयचे मॅची खातीर पुर्ण तयारी करून मैदानांत देंवतलें. जर्मनीक हारोवप शक्य आसा. जी रणनिती तयार करतले तेच तरेन खेळ करचो पडटलो अशें ताणें मुखार म्हणलें.
संवसारीक सर्तींतली दुसरी सेमी फायनल आयजूच स्पेन आनी फ्रान्स ह्या पंगडां मदीं जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
