भांगरभूंय | प्रतिनिधी
भारताच्या बायलांच्या हॉकी पंगडान राष्ट्रकूल खेळां सर्तींतले अ गटांतले आपले पयले मॅचींत घानाक 5-0 अशा व्हडा फरकान हारयलो. भारता वतीन गुरजीत कौरान दोन, जाल्यार नेहा, संगीता कुमारी आनी सलीमा टेटे हिणें दरेकी एक गोल केलो.
गुरजीत कौरान पयल्या क्वॉर्टरांत भारताचें खातें उगडलें. तिणें मॅचीच्या तिसऱ्याच मिनटाक गोल केलो. एका गोलान फाटीं पडिल्ल्या घानान दुसऱ्या क्वॉर्टरांत लय मेळोवप सुरवात केली.
मॅचीच्या 27व्या मिनटाक घानान भारताच्या गोलपोस्टाचेर हल्लो केलो. पूण, मुखेली आनी गोलकीपर सविता पुनियान उत्कृश्ठ रितीन गोलपोस्टाची राखण केली. ते उपरांत घानाक आनीक एक पॅनल्टी कॉर्नर मेळ्ळो. पूण, सवितान परतून एकदा जबरदस्त प्रदर्शन करतना गोल पडपा पसून आडायलो.
ते उपरांत भारतान प्रतिहल्लो सुरू केलो. मध्यांतर जावपाक तीन मिनटां बाकी आसतना भारतान आनीक एक गोल केलो. हो गोल नेहान केलो. तिसऱ्या आनी चवथ्या क्वॉर्टरांत भारतान मॅची पयली मॅच घट केली. संगीता कुमारीन भारता वतीन तिसरो गोल केलो. जाल्यार गुरजीतान पॅनल्टी स्ट्रोकाचेर आपलो दुसरो आनी पंगडाचो चवथो गोल केलो.
अखेरेक सलीमा टेटेन गोल करून भारताक सोंपें जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
