भारताच्या भावोजीक परबीं

भांगरभूंय | प्रतिनिधी

हांव देशाक कृतीन जोडटलों, उतरांनी न्हय. म्हज्या पक्षा खातीर देशा खातीर योगदान दिवप हो म्हजे जिणेंतलो सगल्यांत व्हडलो भोवमान आसतलो.

शुक्रारा 28 तारखेक ब्रिटनांत इतिहास घडटलो. ते दीस मूळ भारतीय व्यक्ती पयले खेप प्रधानमंत्र्यांच्या कदेलाचेर अधिकृतपणान बसतली. ब्रिटनाची ती व्यक्ती सगल्यांत तरणाटी प्रधानमंत्री आसतली. ज्या ब्रिटीशांनी भारताचेर देडशीं वर्सां राज्य केलें. भारतीयांक गुलामा सारके वागयले. तातूंतलो एक मूळ भारतीय तांचेर राज्य करपाचो आसा. सोमारा दिवाळेक ताची प्रधानमंत्री म्हूण निवड जाली. मंगळारा राजा चार्लस हांणी नेमणूक पत्र दितकच तांणी आपल्या ब्रिटीश नागरिकांक फुडाराच्या येवजण्या विशीं सांगलें. अर्थांत ती व्यक्ती म्हणल्यार नवे प्रधानमंत्री ऋषी सुनक. पिराय फक्त 42 वर्सांची. अर्थशास्त्राचो तांचो विशेश अभ्यास. प्रधानमंत्री बोरिस जाॅन्सन मंत्रीमंडळांत ते अर्थमंत्री आशिल्ले. उपरांत लीस ट्रस प्रधानमंत्री जाली. ती सुनक हांकां हारोवन. पूण, 45 दिसांनी तिकाय पद सोडचें पडलें. कारण म्हारगाय आनी कोसळिल्ली अर्थवेवस्था. जिणे गरजेच्या वस्तूंचें मोल मळबाक तेंकिल्ल्यान लोक तिडकले. खासदारुय उंचाबळ जाले आनी ट्रसाक कदेल रिकामी करचें पडलें. आतां सुनक प्रधानमंत्री जाल्यात. आमचे प्रधानमंत्री नरेंद्र मोदी हांणी तांकां येवकार दितना, संवसारा मुखार आशिल्ले साबार मुद्दे सोडोवपाक तांच्या सांगातान काम करपाक आपल्याक आवडटलें, अशें म्हणलां. मात, हे वटेन सोशल मिडियाचेर ऋषी सुनक कोणाचो, हाचेर फाटले दोन दीस उतरांचें झूज पेटलां.
कालचे नवे म्हायती प्रमाण, सुनक हांचो आजो रामदास सुनक गुजरनवालाचे (सध्या पाकिस्तानांत) 1935 त ते क्लार्क म्हूण नैरोबीक गेले. मागीर 1937 त तांची घरकान्न सुहागरानी माय सयत केनया पावली. रामदास थंय आयिल्ले. कांय काळान 1960 त पुराय कुटुंब पोटा- पाणया खातीर ब्रिटनाक गेलें. सुनकाच्या बाबाचो, डाॅ. यशवीर हांचो जल्म केनयांत जाला, तर आवय उषा तांझानियाची. ऋषी हांचो जल्म 12 मे 1980 दिसाचो. तांकां दोन भयणी आसात. तिनूय भांवडांचें भुरगेपण, शिक्षण ब्रिटनांत जालां. ऋषीची घरकान्न अक्षता मात भारतीय नागरीक. इन्फोसिसाचे संस्थापक डाॅ. नारायण मूर्ती आनी साहित्यीक, समाजवावुरपी सुधा मूर्ती हांची ती चली. ऋषी हांकां कांय भारतीय आमचोच तो, म्हणटात, तर गुजरनवाला पाकिस्तानांत आशिल्ल्यान पाकिस्तानी लोकांच्या अभिमानाकूय ओतो आयला.
ऋषी सुनक हांणी काल पत्रकार परिशदेंत उलयतना म्हज्या ब्रिटन देशाची अर्थवेवस्था वयर काडपाक आनी नागरिकांच्या मनांत विस्वास निर्माण करपाक हांव वावुरतलों, अशें म्हणलां. हें सांगतना तांणी आपल्या पक्षाची आदली प्रधानमंत्री लिझ ट्रस हिची कांयच चूक नाशिल्ली. तिणें घेतिल्ले 1-2 निर्णय चुकले खरे, पूण तिणें ते प्रामाणिकपणान चालीक लायिल्ले, अशेंय म्हणलें. वेंचणुकेंत आपणाक हारयिल्ले व्यक्ती विशीं सट करून कोण बरें उलयनात. ती विरोधी पक्षांतली आसल्यार विचारूंच नाकात. मात सुनक जे उलयले, तातूंत ते कितल्या विशाल काळजाचे हाचें दर्शन जालें. हांव देशाक कृतीन जोडटलों, उतरांनी न्हय. म्हज्या पक्षा खातीर देशा खातीर योगदान दिवप हो म्हजे जिणेंतलो सगल्यांत व्हडलो भोवमान. हांव प्रामाणीकपणान काम करपाचें उतर दितां, अशेंय तांणी स्पश्ट केलें. ह्या उतरां पसून संवसारांतल्या सगल्या राजकी फुडाऱ्यांनी खूब कितें शिकपाक जाय. कारण एकामेकांचेर उतरांनी टिका करप, दिशाभूल जावन लोकांचो गोंदळ जातलो, अशीं उतरां हुशारकायेन सोडप, हातूंत बरेच फुडारी दंग आसात. दिसाळीं वाचल्यार हें होलमता. कोण खरो, कोण फट हेंच लोकांक समजना जालां. सुनक हें टाळटले अशी आस्त आसा.
तांच्या मंत्रीमंडळाचो 29 वेर सोपूतविधी जातलो. कांय मंत्री तेच आसूं येता. ब्रिटनाक सध्या अर्थशास्त्र्याचीच चड गरज. फुडले स म्हयने तरी अर्थवेवस्थेचेर भर दिवचो पडटलो. सुनक हांकां प्रधानमंत्री म्हूण नेमणूक पत्र मेळ्ळें तेन्ना पौंड डाॅलराचे तुळेन मात्सो देंवलो. भारतान पयल्यान पयलीं रोजगाराचे नदरेन ब्रिटनांतल्यो व्हडल्यो कंपन्यो हांगां हाडपाचो यत्न केल्यार बरो. खेळाच्या मळार युरोपांत व्हड संद आसा, ते नदरेनूय यत्न जावचे. भारतांतल्यान परत वतना ब्रिटिशांनी जें कितें उबारून व्हेलें, तेंय हाडपाचो यत्न जावंक जाय. कोहीनूर हिरो आतां मेळटलो, अशी कांय जाणांक भाबडी आशा दिसता. दुर्मीळ इतिहासीक कागदां पयलीं मेळपाक जाय. मात ताचेय परस दोनूय देशांचे संबंद आनीक सुदारून उद्देग, खेळ, मनोरंजन, उच्च शिक्षणाच्या मळाचेर आमकां फायदो जावचो. भारताच्या भावोजी कडल्यान इतली तरी अपेक्षा दवरूंया.